Isaiah 51
1 上主講：追求公義、尋求上主个人啊，愛聽𠊎个話。你等愛想看仔，你等像係對石頭爆出來个，對石坑挖出來个。
2 回想你等个祖先亞伯拉罕；回想𫱔你等个莎拉。當𠊎呼召亞伯拉罕个時，佢並無孻仔；總係𠊎賜福給佢，使佢有當多个子孫。
3 𠊎定著愛憐憫耶路撒冷，愛安慰住在錫安荒埔个人。𠊎愛使該曠野變做像伊甸園；𠊎愛使沙漠成做上主个花園。該位會有快樂、歡喜，㧯讚美感謝个歌聲。
4 𠊎个子民啊，愛聽！𠊎个國民啊，愛注意聽：𠊎愛將𠊎个法律賜給萬國；𠊎个公義會帶給佢等光明。
5 𠊎主持公義个時間到了，𠊎个救恩已經發出。𠊎愛親自統治萬民；眾海島攏總等等𠊎，盼望𠊎去拯救它兜。
6 你等昂頭望天空，低頭看大地。天空會像煙雲消散；大地會像衫褲爛掉；地上个人民也會像烏蠅死掉。總係𠊎个拯救永遠長存；𠊎个公義定著毋會廢掉。
7 知麼介係公正、記得𠊎教訓个人啊，你等愛聽𠊎个話！毋使驚別人个侮辱㧯嘲謔；
8 佢等會像衫褲被蛀蟲蛀掉，像羊毛被蟲仔食掉。總係𠊎个公義永遠長存，𠊎个拯救直到萬代。
9 上主啊，擎起來！將你滿有能力个手擎起來！就像古早該兜日仔共樣。敢毋係你將海怪拉哈伯剁到碎碎？敢毋係你刺死該惡龍？
10 你識使大海燥掉，使深潭變做旱地，在深海中開大路，俾你所救贖个人通過。
11 該兜你所救贖个人一定會轉來；佢等會快樂大聲唱歌，歡歡喜喜來到錫安。佢等會永遠歡喜快樂，毋會再憂愁歎息。
12 上主講：係𠊎，安慰你个就係𠊎！你樣愛使驚該兜會死个人？驚該兜生命像草个世間人？
13 你毋記得造你个上主係麼？敢毋記得係麼人開天、闢地？你做麼介歸日驚迫害你个人，驚想愛毀滅你个人大發譴？這下佢等个大發譴在㖠位呢？
14 被人壓迫个當遽會得到自由了；佢等毋會落陰間、也毋會欠食物。
15 𠊎係上主，你个上帝；𠊎攪動大海，使海浪吼吼滾。𠊎个名係上主—萬軍个元帥！
16 𠊎愛將𠊎个話傳給你，𠊎愛用𠊎个手遮等你。𠊎就係該開天闢地个，又對錫安講：你係𠊎个子民！
17 耶路撒冷啊，䟘起來！䟘起來，企正來！上主責罰你个時，使你啉大發譴个杯，使你啉到跉跉傾傾。
18 你養育个子民，無一個引導你；在你畜大个子民當中，也無一個牽你个手。
19 你个土地受到毀滅、破壞，你个人民堵到飢荒、戰爭；這兩種災禍臨到你，無人為你悲傷，無人來安慰你。
20 你个子民在街頭巷尾昏倒；佢等像羚羊落在羅網肚。佢等啉滿上主个大發譴，承受上帝个責備。
21 耶路撒冷受苦个子民啊，你等个醉毋係因為啉酒醉；這下你等愛聽好！
22 至高个上主—為你等辯護个上帝，恁樣講：看啊，𠊎已經將該使你等跉跉傾傾个杯仔拿走；該係𠊎發譴个時給你等个杯；你等毋使再啉了。
23 𠊎愛將這杯轉給欺負你等个人；佢等識對你等講：「伏下來，俾𠊎等踏過去！」你等就乖乖將背囊準路被人行。