Hebrews 9
1 頭一個約，有禮拜个例規㧯人造个禮拜場所。
2 所起个聖帳篷，頭一層安到聖所，底背有燈臺、桌仔，㧯敬神个餅。
3 第二領布簾後，有一層聖帳篷安到至聖所，
4 底背有燒香用个金香壇㧯包金个約櫃，櫃肚放等裝嗎哪个金罐仔，又有亞倫該支發過芽个柺棍仔㧯寫等十條誡个兩垤石版。
5 約櫃頂高有基路伯，表示上帝个臨在；基路伯个翼胛遮等赦罪个座位。關係這兜，這下無法度詳細說明。
6 這兜東西照恁樣安排好勢。該兜祭司就逐日入聖帳篷个外層去舉行禮拜个儀式；
7 總係內層該間，大祭司正做得入去，一年也只有一擺；為到自家㧯人民無意所犯个過失，佢逐擺愛帶等血入去獻給上帝。
8 聖靈通過這兜安排來指明，外層个聖帳篷若還在，透入至聖所个路就吂開。
9 外層聖帳篷係到這下為止个一種預表。這就係講，獻禮物㧯祭物給上帝毋會使敬拜个人內心成做完全；
10 這兜係有關飲食㧯各樣个潔淨儀式定定。這種外表个例規，到上帝改正一切个時就失效了。
11 這下，基督已經來到；佢做大祭司，已經實現一切个好事。佢入去个聖帳篷還較大，還較完全，毋係人个手起个；這就係講，毋係屬這受造个世界。
12 基督進入至聖所，一擺就罅；該時，佢並無用山羊㧯細牛个血做祭物，反轉用佢自家个血，來俾𠊎等得到永遠个救贖。
13 在禮儀中，用山羊个血、牛牯个血、㧯牛乸个灰，拂在該兜無淨浰个人身上，若係能清掉佢等个垃圾，使佢等得到淨浰，
14 恁樣，基督个血所能成就个敢毋係還較多嗎？通過該永遠个靈，基督獻自家做無缺點个祭物給上帝。佢个血會潔淨𠊎等个良心，除掉𠊎等腐敗个行為，使𠊎等事奉永生个上帝。
15 因為恁樣，基督成做這新約个中保，用死來贖該兜在頭一個約之下所犯个罪過，使上帝所呼召个人有好領受佢所應許永遠个福氣。
16 遺言，一定愛證明立遺言个人已經死掉；
17 因為，立遺言个人還生，遺言就無效，佢一死，遺言就有效力。
18 所以，連頭一個約也係愛用血來設立正有效。
19 當時，摩西照法律先將所有个誡命傳給人民，然後佢拿細牛㧯山羊个血，摻兜水，用深紅色个絨㧯牛膝草來蘸，拂在法律書㧯所有人民个身上。
20 佢講：「這係立約个血，係上帝㧯你等立約个記號。」
21 共樣，摩西也用血拂在聖帳篷，並禮拜㧯禮儀所用各樣个器皿頂高。
22 照法律个規定，差毋多所有个器皿全部係用血來潔淨个；無流血，就無赦罪。
23 既然這兜照天頂个樣式所造个器皿，一定愛用恁樣來潔淨；天頂个原物就還較愛用更好个祭物去潔淨。
24 基督並無入去人手所起个聖所；該不過係真聖所个影像定定。佢係進到天頂，就係真聖所，這下為到𠊎等个緣故企在上帝个面前。
25 猶太人个大祭司愛逐年帶等頭牲个血入去至聖所；總係，基督毋使獻自家多多擺。
26 若毋係恁樣，對創造世界以來，佢就愛忍受苦難多多擺囉。總係這下，基督在末世顯現一擺，將自家獻做祭物，來除掉罪。
27 照所註定个，世間人攏總有一擺个死，死後還愛受上帝審判。
28 像恁樣，基督也犧牲一擺，來擔當眾人个罪。將來，佢還愛顯現一擺，毋係為到對付罪，係愛拯救該兜迫切等候佢个人。