1法律並毋係將來該兜美好事物个真相，係該兜事物个影像定定。共樣个祭物逐年一直獻上，法律又樣般做得通過這兜祭物使來到上帝面前个人成做完全呢？
2若係有可能，一切个獻祭早就停止囉！因為該兜敬拜上帝个人，既然罪已經得到潔淨，就毋會再有罪个感覺了。
3事實上，逐年个獻祭反轉使人想起自家个罪，
4因為牛牯㧯山羊个血無法度除掉人个罪。
5因為恁樣，基督來到世間个時，對上帝講：你無愛祭物㧯供物；你已經為𠊎準備身體。
6你也無合意燒化祭㧯贖罪祭。
7所以𠊎講：看啊，𠊎來了！上帝啊，𠊎來係愛遵行你个旨意，就像法律書所記載關係𠊎个事。
8一開始，佢講：「你無愛，也無合意祭物㧯供物，燒化祭㧯贖罪祭。」雖然這兜祭物係照法律个規定所獻个，佢還恁樣講。
9接等，佢又講：「看啊，𠊎來了，係愛遵行你个旨意。」可見，上帝取消先前一切个獻祭，愛用基督个犧牲來代換。
10照上帝這個旨意，耶穌基督獻自家个身體，一擺就圓滿，使𠊎等聖化來歸主。
11每一個猶太个祭司逐日企等事奉上帝，常常獻共樣个祭物；總係這兜祭物永遠無法度除掉人个罪。
12總係，基督獻贖罪祭一擺，永遠就有效，然後坐在上帝个右片，
13等候上帝使佢个敵人降服在佢个腳下。
14因為佢獻祭一擺，該兜聖化歸主个人就永遠完全。
15聖靈也對𠊎等做證；佢先講：
16主恁樣講：在將來該兜日仔，𠊎愛㧯佢等立這種个約：𠊎愛將𠊎个法律放入佢等个心，寫在佢等个頭腦。
17然後，佢講：「𠊎無愛再記得佢等个罪惡㧯過犯。」
18既然這兜罪得到赦免，就無需要再有贖罪祭了。
19所以，兄弟姊妹啊，通過耶穌流血到死，𠊎等就做得安心入去至聖所。
20耶穌已經為𠊎等開一條又新又生个路；這條路透過布簾，就係通過佢个身體。
21既然𠊎等有一個大祭司掌管上帝个家庭，
22恁樣，𠊎等應該用誠實个心、堅定个信心，用已經潔淨、無邪惡个良心，㧯淨水洗過个身體，來親近上帝。
23𠊎等愛堅定持守𠊎等所告白个盼望，因為應許𠊎等个上帝係信實个。
24𠊎等愛彼此關心，激發愛心，勉勵行善。
25有兜人放掉參加聚會个習慣；毋好學佢等，反轉愛互相勸勉。你等既然知主个日仔會到了，還較愛恁樣。
26因為𠊎等認識真理以後，若係還故意犯罪，就毋會再有贖罪个祭物了；
27只有驚驚轆轆等候審判㧯該愛燒滅對敵上帝个人个烈火！
28違犯摩西法律个，有兩三個人做證，就一定愛處死刑，得毋到憐憫。
29恁樣，踐踏上帝个孻仔，看輕上帝立約个血—就係潔淨佢个罪个血，又侮辱賜恩典个靈，這種人會樣般呢？想看仔，佢敢毋係會受到還較重个刑罰嗎？
30𠊎等知係麼人講：「伸冤在𠊎，𠊎一定愛報應」；又講：「主愛審判佢个子民。」
31落在永生上帝个手中係樣般得人驚啊！
32愛記得往時个日仔。上帝光照你等以後，雖然堵到盡多痛苦，總係你等在奮鬥中並無失敗。
33有時，你等識當眾被人侮辱㧯苦毒；有時，也識同該兜堵到這兜苦難个人企共下。
34你等分擔坐監个人个苦難。財產被人搶走，你等也歡喜忍受；因為你等知，你等有還較好又長存个產業。
35所以，你等个勇氣毋好無掉去；這勇氣會帶給你等極大个獎賞。
36為到實行上帝个旨意並領受佢个應許，你等定著愛忍耐。
37因為聖經講：加一下仔，該愛來个就會到，毋會延纏。
38屬𠊎个義人會因為信得到生命。總係，佢若退後，𠊎就毋歡喜佢。
39好得𠊎等毋係退後致到滅亡个人；𠊎等係有信心來得救个人。