Bible

1 𠊎等所討論个重點係：𠊎等有像恁樣个大祭司；佢坐在天頂至大權能者个寶座右片。 2 佢在至聖所擔任大祭司；這聖所毋係人个手起个，係主所起真个聖帳篷。 3 每一個大祭司攏總係為到獻禮物㧯祭物來設立个；所以，𠊎等个大祭司也應該有所奉獻。 4 若係佢在地上，佢就無做祭司，因為已經有照猶太法律來獻禮物个祭司。 5 這兜祭司係照天頂聖所个樣式㧯影像來事奉。像摩西愛起聖帳篷个時，上帝警告佢，講：「愛謹慎，全部愛照𠊎在山頂指示你个樣式去造。」 6 總係，耶穌這下所擔任个祭司職務超越佢等个盡多，就像佢在上帝㧯人个中間做中保个約係較好个，因為這個約係照該較好个應許來立个。 7 第一個約若無缺點，就毋使有第二個約。 8 總係上帝責備佢个子民个時，講：主講：日仔會到，𠊎愛㧯以色列个人民並猶大个人民另外立新个約。 9 這約毋像頭擺𠊎㧯佢等个祖先所立个約；在該兜日仔𠊎牽等佢等个手，帶領佢等出埃及。總係佢等無遵守𠊎㧯佢等所立个約。所以主講：𠊎也無愛搭佢等。 10 主又講：在將來該兜日仔，𠊎愛㧯以色列人民立這種个約：𠊎愛將𠊎个法律放入佢等个頭腦，寫在佢等个心上。𠊎愛做佢等个上帝，佢等愛做𠊎个子民。 11 佢等毋會再教同胞，也毋使㧯自家个兄弟講：「愛認識主」；因為對最細个到最大个，佢等攏總會認識𠊎。 12 𠊎愛赦免佢等个過犯，無愛再記得佢等个罪惡。 13 既然上帝提到「新个約」，可見佢已經將頭一個約看做舊个。緊舊緊老个，就會盡遽消滅掉。