Hebrews 7
1 這麥基洗德係撒冷王，也係至高上帝个祭司。亞伯拉罕㓾死眾王，對戰場轉來个時，麥基洗德去迎接佢，又為佢祝福。
2 亞伯拉罕將自家所得到个拿十分之一給佢。基本上，麥基洗德照字翻譯意思係「公義个王」；又因為佢係撒冷王，佢个名有「和平个王」个意思。
3 關係麥基洗德个爺𡟓、族譜、抑係佢个出世㧯過身，全部無記錄好查；佢係像上帝个孻仔，永遠做祭司。
4 你等想看仔，這個人有幾偉大！連族長亞伯拉罕也將所有戰利品个十分之一送給佢。
5 該兜利未个子孫做祭司，係照法律个規定對以色列人，就係佢等自家个同胞，收十分之一，雖然這兜人也係亞伯拉罕个子孫。
6 麥基洗德毋係利未个子孫，總係佢對亞伯拉罕接受十分之一，還為得到上帝應許个亞伯拉罕祝福。
7 祝福人个比領受祝福个人較大，這係無麼介好拗个。
8 該兜收十分之一个祭司，係會死个人；總係，也收十分之一个麥基洗德，照聖經个記載，佢係一直生下去个。
9 𠊎等做得講，亞伯拉罕納十分之一个時，利未也有納十分之一；雖然利未㧯佢个子孫係收十分之一个。
10 因為，麥基洗德迎接亞伯拉罕个時，利未還吂出世；𠊎等做得講，佢還在佢个祖先亞伯拉罕个身體底背。
11 以色列人所領受个法律係用利未人个祭司制度做根基个。照恁樣來講，這制度个效果若係完全，樣般毋照亞倫个體制，反轉愛照麥基洗德个體制另外興起一個祭司呢？
12 既然祭司制度有改變，法律也需要改變。
13 𠊎等這下所講个，就係𠊎等个主；佢係屬另外一支族；這支族從來毋識有人做過祭司，在祭壇前事奉。
14 𠊎等个主係屬猶大支族，這係大家所知个；摩西講到祭司个時節，並無提起這個支族。
15 事情越來越明顯，因為另外一個像麥基洗德个祭司已經出現。
16 佢成做祭司，並毋係照人个法律規定，係因為佢有毋會消滅个生命个大能。
17 因為聖經講：「你愛照麥基洗德个體制永遠做祭司。」
18 恁樣，因為舊个規定無力又無用，就廢掉了。
19 摩西个法律無法度使麼介變做完全；總係這下，𠊎等有一個較好个盼望，通過這個盼望，𠊎等就做得接近上帝。
20 另外，還有上帝个發誓。別个祭司封立个時，無這種个發誓；
21 總係，耶穌做祭司就有這種个發誓；上帝對佢講：主已經發誓，絕對無反悔：「你愛永遠做祭司。」
22 因為有恁大个分別，耶穌就成做較好个約个保證。
23 還有一個分別：先前該兜做祭司个盡多，因為佢等會死，無法度一直做下去；
24 總係，因為耶穌係永遠生个，毋使換人做祭司。
25 所以，佢能永遠拯救一切通過佢來親近上帝个人；因為佢永遠生等，為佢等代求。
26 恁樣，耶穌就係𠊎等所需要个大祭司。佢係聖潔、無過失、無罪个；佢係對罪人中分別出來个；佢个地位超越諸天。
27 佢㧯其他个大祭司無共樣，毋使逐日先為自家个罪獻祭，然後正為人民个罪獻祭。佢只有獻過一擺祭，將自家獻上，一擺就圓滿。
28 摩西个法律設立人做大祭司，佢等做大祭司還有缺點；總係，在有法律以後，上帝用發誓來應許，設立佢个孻仔做大祭司，使佢完全，直到永遠。