Bible

1 Mjeshtrit të korit. Për Gititin. Psalm i Davidit. 2 O Zot, Zoti ynë, sa i mrekullueshëm është emri yt mbi tokën mbarë! Mbi qiej e shpalos madhështinë tënde. 3 Me gojën e fëmijëve dhe të foshnjave tregove fuqinë kundër armiqve të tu, që t'i bësh të heshtin armiq e kundërshtarë. 4 Kur vështroj qiellin, veprën e duarve të tua, hënën e yjet që ti krijove, 5 ç'është njeriu që të kujtohesh për të, apo biri i njeriut që të kujdesesh për të? 6 Pak më pak se Perëndi e bëre, e kurorëzove me nder e me lavdi. 7 I dhe pushtet mbi veprat e duarve të tua, gjithçka ia nënshtrove nën këmbë: 8 mbarë dhentë, gjedhët dhe egërsirat e fushës, 9 zogjtë e qiellit, peshqit e detit, gjithçka që shtigjet e deteve përshkon. 10 O Zot, Zoti ynë, sa i mrekullueshëm është emri yt mbi tokën mbarë!