Psalms 136— NO1938N

¹Prisa Herren, for han er god, hans miskunn varer æveleg.

²Prisa han som er Gud yver alle gudar! For hans miskunn varer æveleg.

³Prisa han som er Herre yver alle herrar! For hans miskunn varer æveleg;

⁴han, den einaste som gjer store under, for hans miskunn varer æveleg;

⁵han som gjorde himmelen med vit, for hans miskunn varer æveleg;

⁶han som strakte jordi yver vatni, for hans miskunn varer æveleg;

⁷han som gjorde dei store ljos, for hans miskunn varer æveleg,

⁸soli til å råda um dagen, for hans miskunn varer æveleg,

⁹månen og stjernone til å råda um natti, for hans miskunn varer æveleg;

¹⁰han som slo egyptarane gjenom deira fyrstefødde, for hans miskunn varer æveleg,

¹¹og førde Israel ut frå dei, for hans miskunn varer æveleg,

¹²med sterk hand og strak arm, for hans miskunn varer æveleg;

¹³han som skar sund Raudehavet, for hans miskunn varer æveleg,

¹⁴og let Israel ganga midt igjenom, for hans miskunn varer æveleg,

¹⁵og kasta Farao og heren hans i Raudehavet, for hans miskunn varer æveleg;

¹⁶han som førde sitt folk gjenom øydemarki, for hans miskunn varer æveleg;

¹⁷han som slo store kongar, for hans miskunn varer æveleg,

¹⁸og drap herlege kongar, for hans miskunn varer æveleg,

¹⁹Sihon, amoritarkongen, for hans miskunn varer æveleg,

²⁰og Og, Basan-kongen, for hans miskunn varer æveleg,

²¹og gav deira land til arv, for hans miskunn varer æveleg,

²²til arv for Israel, sin tenar, for hans miskunn varer æveleg;

²³han som kom oss i hug i vår stakkarsdom, for hans miskunn varer æveleg,

²⁴og reiv oss ut or fiendevald, for hans miskunn varer æveleg;

²⁵han som gjev alt som lever mat, for hans miskunn varer æveleg.

²⁶Prisa Gud i himmelen, for hans miskunn varer æveleg!