Numbers 13— NO1938N

¹Og Herren tala til Moses og sa:

²Send ut folk til å forfara Kana'anslandet, som eg no vil gjeva Israels-borni! Ein mann for kvar fedreætt skal de senda, og alle skal vera av dei fremste mennene deira.

³So sende Moses folk ut frå Paranøydemarki, som Herren hadde sagt, og dei han sende, var alle av dei gjævaste mennene i Israel.

⁴Dei heitte: Sammua, son åt Sakkur, av Rubens-ætti;

⁵Safat, son åt Hori, av Simeons-ætti;

⁶Kaleb, son åt Jefunne, av Juda-ætti;

⁷Jigeal, son åt Josef, av Issakars-ætti;

⁸Hosea, son åt Nun, av Efra'ims-ætti;

⁹Palti, son åt Rafu, av Benjamins-ætti;

¹⁰Gaddiel, son åt Sodi, av Sebulons-ætti;

¹¹Gaddi, son åt Susi, av Josefs-ætti, av Manasse-greini;

¹²Ammiel, son åt Gemalli, av Dans-ætti;

¹³Setur, son åt Mikael, av Asers-ætti;

¹⁴Nahbi, son åt Vofsi, av Naftali-ætti;

¹⁵Ge'uel, son åt Maki, av Gads-ætti.

¹⁶Det var namni åt dei mennene som Moses sende ut til å rundfara landet; men Hosea, son åt Nun, kalla han Josva.

¹⁷Han sende dei på njosningsferd til Kana'anslandet og sa til dei: Far upp her, til sudlandet, og tak upp i fjellet

¹⁸og sjå korleis landet er laga, og um folket som bur der, er sterkt eller veikt, um dei er få eller mange,

¹⁹og um landet deira er godt eller låkt, og kva slag byar dei bur i, um dei bur i læger eller borger,

²⁰og um jordi er feit eller skrinn, og um det er tre eller ikkje. Ver trøystuge og tak med dykk noko av frukti i landet! Det var då i det belet druvone for til å mogna.

²¹So tok dei av stad og endefor landet alt ifrå Sinøydemarki til Rehob, som ligg innmed vegen til Hamat.

²²Dei for upp frå sudlandet og kom til Hebron. Der budde Akiman og Sesai og Talmai, Anaks-sønene - Hebron var bygt sju år fyre Soan i Egyptarlandet.

²³So kom dei til Eskoldalen. Der skar dei ei vintregrein med ein druvekrans, som tvo mann laut bera millom seg på ei stong, og so nokre granateple og fikor.

²⁴Den staden vart sidan heitande Eskoldalen etter den druvekransen som Israels-borni skar av der.

²⁵Då det leid av fyrti dagar, kom dei att og hadde endefare landet.

²⁶Dei fann Moses og Aron og heile Israels-lyden i Paranøydemarki, i Kades, og gav fråsegn um det dei hadde set, og synte dei fruktene frå Kana'anslandet.

²⁷Og dei sa til Moses: Me kom til det landet du sende oss til, og det er vist at det landet fløymer med mjølk og honning, og her ser de fruktene som veks der.

²⁸Men folket som bur der er sterkt, og byane er som borger og ovstore; der såg me Anaks-sønene og.

²⁹Amalek-folket bur i sudlandet, og i fjellbygdene hetitane og jebusitane og amoritane, og utmed havet og langsmed Jordan bur Kana'anitane.

³⁰Då tok folket til å murra mot Moses, men Kaleb stagga på dei og sa: Ja, me vil fara dit og leggja landet under oss; me kann godt taka det.

³¹Men dei mennene som hadde vore med han, sa: Me kann ikkje ganga imot dette folket; for dei er sterkare enn me.

³²Og dei lasta burt landet for Israels-borni og sa: Det landet me for igjenom og skoda, er eit land som øyder ut dei som bur der, og alle me såg der, var kjempekarar;

³³der såg me risane, Anaks-sønene, som er av riseætt, og mot dei tyktest me å vera berre engsprettor, og so tykte dei og.