Zechariah 8
1 И пак дојде слово од Господ Саваот:
2 вака вели Господ Саваот: „Љубоморен сум за Ерусалим и за Сион со голема ревност и со голем гнев горам за него.“
3 Така вели Господ: „Ќе се вратам во Сион и ќе живеам во Ерусалим, и Ерусалим ќе се вика град на верноста, и гората на Господ Саваот ќе се вика — Света Гора.“
4 Така вели Господ Саваот — „И пак старци и старици ќе седат по улиците на Ерусалим, секој со стапчето свое поради големата старост своја.
5 А и улиците на тој град ќе се исполнат со момчиња и девојки, кои ќе си играат по улиците негови.“
6 Вака вели Господ Саваот: „Ако во очите на другите им биде чудно во тие дни, зар ќе биде тоа чудно и во очите Мои?“ — вели Господ Саваот.
7 Вака вели Господ Саваот: „Ете, Јас ќе го спасам Својот народ од источната земја и од западната;
8 ќе ги доведам, и тие ќе живеат во Ерусалим и ќе бидат Мој народ, и Јас ќе им бидам нивни Бог, во верност и во правда.“
9 Така вели Господ Саваот: „Поткрепете ги сега рацете свои вие, што ги слушавте овие зборови од устата на пророците, кои беа при основањето на домот за Господ Саваот, за да се изгради храмот.
10 Зашто пред оние дни немаше ни плата за човек ниту награда за трудот на животното; немаше спокојство од непријателите ни за оној што доаѓаше, ниту за оној што си одеше; и дозволував Јас секој човек да му е непријател на друг човек.
11 А сега за остатокот од овој народ Јас нема да сум таков како во поранешните денови“ — вели Господ Саваот.
12 Зашто сеидбата ќе се врши во мир, лозата ќе го даде својот плод, земјата ќе го даде својот род, а и небесата ќе ја даваат својата роса; и сето тоа ќе го предадам на остатокот од овој народ.
13 И како што вие, доме Јудин и доме Израелов, бевте проколнати меѓу народите, така ќе ве избавам, и вие ќе бидете благословени; не плашете се, рацете ваши нека се поткрепат!
14 Зашто така вели Господ Саваот: „Како што бев определил да ве казнам, кога татковците ваши Ме разгневија — вели Господ Саваот — и не зажалив,
15 така пак определив во овие дни на Ерусалим да му направам добро и на домот Јудин; не плашете се!
16 Еве ги наредбите што треба вие да ги извршувате: зборувајте вистина еден на друг; праведно и мирољубово судете пред градските порти.
17 Никој од вас да не му мисли зло на ближниот свој, и не посакувајте лажна клетва, зашто сето тоа Јас го мразам“ — говори Господ.
18 И дојде слово до мене од Господ Саваот:
19 Вака вели Господ Саваот: „Постот во четвртиот месец, постот во петтиот, постот во седмиот и постот во десеттиот месец за домот Јудин ќе бидат радост и голема веселба, само сакајте ги вистината и мирот.“
20 Така вели Господ Саваот: „Уште ќе доаѓаат народи и жители од многу градови,
21 и ќе дојдат жителите од еден град кај жителите во друг град, — па ќе речат: да дојдеме да се помолиме пред лицето на Господ и да Го побараме Господ Саваот; тогаш секој ќе рече — ќе појдам и јас.
22 И ќе доаѓаат многу племиња и народи силни, за да Го бараат Господ Саваот во Ерусалим и да се помолат пред лицето на Господ.“
23 Така вели Господ Саваот: „Во тие дни ќе се фаќаат по десет души од разни народи за полата од Јудеец и ќе речат — ќе појдеме со тебе, зашто чувме дека Бог е со вас.“