Psalms 103— 2006

¹Благословувај Го, душо моја, Госпо­да, и целата моја внатрешност да го благословува Неговото свето име!

²Благословувај Го, душо моја, Госпо­да и не заборавај ги сите Негови добрини, на Оној,

³Кој ги очистува сите твои беззаконија, Кој ги исцелува сите твои болести;

⁴Кој го избавува од пропаст твојот живот, Кој те овенчува со милост и со добрини.

⁵Кој го исполнува со добра животот твој, како на орел ти ја обновува твојата младост.

⁶Господ им дава милост и правда на сите угнетени.

⁷Тој му ги покажа Своите патишта на Мојсеј, на Израеловите синови — де­лата Свои.

⁸Штедар и милостив е Господ, долготрпелив и многумилостив;

⁹Тој не се гневи до крај, ниту вечно се лути.

¹⁰Тој не постапува со нас според на­шите беззаконија и не ни плаќа спо­ред нашите беззаконија;

¹¹зашто, колку е големо растојанието од небото до Земјата, толку е голема милоста на Господ спрема оние што се бојат од Него;

¹²колку е далеку исток од запад, тол­ку ги оддалечува Тој од нас на­шите престапи;

¹³како таткото што ги милува сино­вите, така и Господ ги милува оние, кои се бојат од Него.

¹⁴Зашто Тој го знае нашиот состав, помни дека сме прав.

¹⁵Дните на човекот се како трева; ка­ко полски цвет, така прецутува тој;

¹⁶ќе дувне ли над него ветар, и веќе го нема, и местото негово веќе не го памети.

¹⁷А милоста на Господ е од век до век спрема оние, кои се бојат од Него, и правдата Негова е од чеда на чеда,

¹⁸кои го чуваат заветот Негов и ги помнат заповедите Негови.

¹⁹Господ го поставил Својот прес­тол на небото, и царството Негово владее над сѐ.

²⁰Благословувајте Го Господа — сите ангели Негови, вие крепки по сила, кои го извршувате Неговиот збор, слушајќи го гласот од зборот Негов;

²¹благословувајте Го Господа — сите Негови војски, Негови служители, кои ја исполнувате волјата Негова;

²²благословувајте Го Господа сите Негови дела, по сите места на Него­вото владеење. Благословувај Го, душо моја, Господа!