Proverbs 2— 2006

¹Синко, ако ги примиш зборовите на Моите заповеди, и ги зачуваш во себеси,

²ако увото твое внимателно ја слу­ша мудроста, ако срцето твое се приклони кон размислување;

³ако ги повикаш знаењето и разумот;

⁴ако ги бараш како сребро и ги истра­жуваш како ризница, —

⁵ќе го разбереш стравот Господов и ќе го најдеш знаењето за Бога.

⁶Зашто Господ дава мудрост; од устата Негова доаѓаат знаењето и разумот;

⁷Тој го зачувува за праведните спасението; Тој е штит за оние кои живеат непорочно;

⁸Тој ги чува патиштата на правдата и ја брани патеката на оние, кои Го по­читуваат.

⁹Тогаш ќе ги разбереш правдата и правосудието, правината и секој до­бар пат.

¹⁰Кога мудрост ќе влезе во срцето твое, и знаењето ќе ѝ биде пријатно на душата твоја,

¹¹тогаш расудувањето ќе те брани, разумот ќе те чува,

¹²за да те спаси од лош пат, од човек, кој говори лага,

¹³од оние, што ги напуштиле патиш­тата на правдата, за да одат по патот на темнината;

¹⁴од оние, што се радуваат, вршејќи зло, кои се восхитуваат на расипаност,

¹⁵чии патишта се криви, и кои талкаат далеку од правиот пат;

¹⁶за да те спаси од туѓа жена, која ги засладува зборовите свои,

¹⁷која го остава пријателот на младоста своја, и која го заборава заветот на својот Бог.

¹⁸Домот нејзин води кон смрт, и па­теките нејзини — кон пеколот;

¹⁹никој од влезените кај неа не се враќа и не стапнува врз патот на животот.

²⁰Затоа оди по патот на добрите и придржувај се кон патеките на пра­ведните,

²¹зашто праведните ќе живеат на земјата, и непорочните ќе опстанат на неа;

²²а беззакониците ќе бидат истребе­ни од земјата, и вероломните — искоренети од неа.