Leviticus 21
1 И пак му рече Господ на Мојсеј, велејќи: „Кажи им на свештениците, синовите Аронови, и речи им да не се допираат до мртовец од народот свој.
2 Само до свој близок роднина: до мајка, до татко, до син и до ќерка, до брат,
3 до сестра, која е мома што живее кај него, немажена, може да се допира, и со тоа да не се осквернува;
4 инаку, не смее да се оскверни со допир до кого и да било од народот свој, за да не стане нечист.
5 Не смеат да ја бричат главата своја, ниту да го потстрижуваат крајот од брадата своја, ни да прават зарези по телото свое.
6 Тие треба да бидат свети пред својот Бог и да не го осквернуваат името на својот Бог, бидејќи тие Му принесуваат жртви на Бога, леб на својот Бог, и затоа треба да бидат свети.
7 Тие не смеат да земаат жени блудници и порочни, не смеат да се женат ни со жена истерана од својот маж, затоа што се тие свети пред својот Бог.
8 И свет нека ти биде, бидејќи тој Му принесува храна на Господ, вашиот Бог; тој треба да ти биде свет, затоа што сум свет Јас, Господ Бог ваш, Кој ве осветува.
9 Ако свештеничка ќерка се оскверни со блудство, таа го осквернила таткото свој: со оган да биде изгорена.
10 А големиот свештеник меѓу браќата свои, врз чија глава е излеано масло за помазание, и кој е осветен за да се облекува во свети одежди, да не ја открива главата своја и облеката своја да не ја кине;
11 и до никаков мртовец да не приоѓа; да не се осквернува со допир ни до умрениот татко свој, ни до мајката своја.
12 Тој од светилиштето да не се оддалечува за да не го оскверни светото на својот Бог, зашто светото масло на Божјото помазание е врз него. Јас сум Господ.
13 За жена тој треба да зема девица;
14 не смее да зема вдовица или оставена или осквернета или блудница, туку само девица од родот свој тој треба да зема за жена.
15 И да не го осквернува своето потомство во народот свој: затоа што сум Јас Господ, Кој го осветува.“
16 И му рече Господ на Мојсеј, велејќи:
17 „Кажи му на Арон: никој од твоето семе во сите родови, кој има телесен недостаток, да не пристапува да Му принесува дар на својот Бог.
18 Никој, кој има телесен недостаток, да не пристапува; ни слеп човек, ниту куц, ниту, пак, со чпртав нос, или со деформирани крајници,
19 ниту таков кому му е раката скршена или ногата скршена,
20 ниту грбав, ниту слабуњав, ниту со перде на очите, ни крастав или со лишај, ниту скопец.
21 Никој човек од родот на свештеникот Арон, кој е со телесен недостаток, не смее да пристапува за да Му принесува жртва на Господ; бидејќи има недостаток, нека не пристапува да принесува дарови Божји,
22 но од храната на својот Бог, од осветените жртви, тој може да јаде;
23 само до завесата да не се доближува и до жртвеникот да не пристапува, затоа што има недостаток: да не го оскверни светилиштето Мое, бидејќи Јас сум Господ, Кој ги осветува.“
24 И Мојсеј им го соопшти тоа на Арон и на синовите негови и на сите синови израелски.