Leviticus 18— 2006

¹И му рече Господ на Мојсеј, велејќи:

²„Кажи им на синовите Израелови и речи им: Јас сум Господ Бог ваш.

³Не постапувајте како што се поста­пува во египетската земја, во која живеевте, не постапувајте ни така како што постапуваат во земјата хананска, во која ве водам, и не управувајте се според нивните закони.

⁴Извршувајте ги сите Мои наредби и пазете ги сите Мои заповеди, постапувајќи според нив. Јас сум Господ, Бог ваш.

⁵Пазете ги сите Мои заповеди и сите Мои закони и извршувајте ги, и секој што ги извршува жив ќе биде. Јас сум Господ.

⁶Никој не смее да се доближува до сродница по тело, за да ја открие го­лотијата нејзина. Јас сум Господ.

⁷И голотијата на таткото свој и голотијата на мајката своја да не ја откриваш; таа ти е мајка, не откривај ја голотијата нејзина.

⁸Голотијата на татковата жена не откривај ја; тоа е голотија на твојот татко.

⁹Голотијата на сестрата твоја, која е од татко ти или од мајка ти, родена во куќата или надвор од куќата, да не ја откриваш голотијата нејзина.

¹⁰Голотијата од ќерката на синот твој или од ќерката на ќерката твоја; не откривај ја голотијата нивна, зашто тие се твоја голотија.

¹¹Голотијата на ќерката од жената на твојот татко, не откривај ја; таа ти е сестра по татко.

¹²Голотијата на татковата сестра не ја откривај; таа е од иста крв со таткото твој.

¹³Голотијата на мајкината сестра не ја откривај; таа е од иста крв со твојата мајка.

¹⁴Голотијата на татковиот брат не ја откривај и до неговата жена не се до­ближувај; таа ти е стрина.

¹⁵Голотијата на снаата своја не ја откривај, таа е жена на твојот син — затоа не ја откривај голотијата нејзина.

¹⁶Голотијата на братовата жена не откривај ја; тоа е голотија на братот твој.

¹⁷Голотијата на жена и на ќерка ѝ не ја откривај; ќерката на синот нејзин и ќерката на ќерката нејзина не ги земај, за да ја откриваш голотијата нивна: тие се од иста крв; тоа е беззаконие.

¹⁸Не земај ја за жена сестрата на твојата жена за да ја откриеш голотијата нејзина пред неа, сѐ уште додека е жива таа, зашто ќе создадеш меѓу нив со­перништво.

¹⁹И до жена, сѐ додека трае чистењето од нечистотијата нејзина, не доближувај се за да ја откриеш голотијата нејзина.

²⁰И со жената на ближниот твој не легнувај, за да излееш семе и да се оскверниш со неа.

²¹Од децата свои не му принесувај жртва на Молох и не го обесчестувај името на твојот Бог. Јас сум Господ.

²²Не легнувај со маж, како со жена: тоа е одвратност.

²³И со ниедно четвороножно животно не легнувај за да излееш семе, па да се оскверниш со него; и жена не смее да легнува под ниедно четвороножно жи­вотно, за да се спои со него: тоа е гнасотија.

²⁴Не осквернувајте се со сево ова, затоа што со сето тоа се оскверниле народите, кои Јас сакам да ги отфрлам од вас;

²⁵и земјата се оскверни, и Јас ги каз­нив поради нивните беззаконија, и така земјата ги исфрли своите жители.

²⁶А вие пазете ги сите Мои закони и сите Мои повелби и не вршете ниедно од сите овие гнасотии, ниту вие овдеш­ните, ниту придојдените што живеат меѓу вас,

²⁷зашто сите тие гнасотии ги правеа луѓето на таа земја, што беа пред вас, и земјата се оскверни;

²⁸за да не ве исфрли земјата и вас, кога ќе ја оскверните, како што ги исфрли народите што беа пред вас.

²⁹Зашто сите, што ги вршат овие гнасотии, ќе бидат истребени од народот свој.

³⁰И така, пазете ги сите Мои повелби за да не постапувате според ниеден од нивните гнасни обичаи, како што правеа оние што беа пред вас, и да не се оскверните со нив. Јас сум Господ, Бог ваш.“