Joshua 16— 2006

¹Потоа ждрепката падна на Јосифовите синови: од Јордан кај Ерихон, на исток од Ерихонските из­вори, низ пустината што почнува кај Ерихон, преку планината во насока на Ветил;

²од Ветил границата оди кон Луз и минува кон пределот Атарот, населен од Аркијците;

³потоа се спушта на запад, кон границата со Јафлетајците дури до пределот Веторон долни, па и до Гезер и излегува кај морето.

⁴Тоа го добија како дел Јосифовите синови Ефрем и Манасија.

⁵Границата на Ефремовите синови според родовите нивни беше оваа: откај исток границата на нивното наследство беше Атрот-Адар до горни Веторон;

⁶потоа границата оди кон запад, се­верно од Михметат, свртува на исток кон Таанат-Силом и минува источно од Јаноах;

⁷а од Јаноах, откако слегува кон Ата­рот и Наарата, допира до Ерихон, и излегува на Јордан;

⁸од Тапуах границата оди кон запад, накај потокот Кана, и завршува кај морето. Тоа е делот на племето на си­новите Ефремови, според родовите нив­ни.

⁹Имаше одделни градови за Ефремовите синови и среде наследената земја на Манасиевите синови, — и сите тие градови беа со селата нивни.

¹⁰Но Ефремовите синови не ги изгонија Хананците, кои живееја во Гезер; затоа Хананците живеат меѓу Ефре­мов­ците до денес, и им плаќаат данок.