Job 18— 2006

¹Проговори Вилдад од Шуах и рече:

²„Кога најпосле ќе им ставиш крај на таквите зборови? Размисли се, па потоа да зборуваме.

³Зошто нѐ сметаш за неразумни животни? Зар сме животни во твоите очи?

⁴О ти, кој во гневот свој ја раскинуваш душата своја! Зарем заради тебе да запусти земјата и карпата да се крене од своето место?

⁵Да, светлината кај беззаконикот ќе згасне, и пламенот од огнот негов нема да остане.

⁶Светлината ќе потемнее во шато­рот негов, светилото негово ќе згасне над него.

⁷Стапките на силата негова ќе ослабат, сопствената мисла ќе го отфрли,

⁸зашто ќе падне во мрежа со нозете свои, и по јамки ќе оди.

⁹Јамката ќе ја фати ногата негова и врвцата ќе се затегне околу него.

¹⁰Скришно се поставени за него сопки на земјата, пречки има на патот по кој оди.

¹¹Ужаси од секаде го демнат и тој се метка наваму — натаму.

¹²Од глад се истоштува силата негова, смртта е готова, близу е до него.

¹³Таа ќе ги испојаде деловите на кожата негова, ќе ги испојаде дело­вите негови првенецот на смртта.

¹⁴Од безбедноста на шаторот негов сосила го извлекуваат и при царот на ужасите го водат.

¹⁵Ќе се населат во шаторот негов, зашто веќе не е на него: живеа­лиштето негово ќе биде посипано со сулфур.

¹⁶Одоздола ќе се исушат корените негови, одозгора ќе овенат ветките негови.

¹⁷Споменот за него ќе исчезне од земјата, на плоштадот ќе го нема името негово.

¹⁸Ќе го изгонат од светлина во тем­нина и ќе го истераат од лицето на земјата.

¹⁹Ни син негов, ни внук нема да има во народот негов: никој нема да остане во живеалиштата негови.

²⁰На Запад и на Исток ќе се чуе за судбината негова, ужас и трепет меѓу луѓето ќе настане.

²¹Таква е судбината на беззаконикот, тоа го чека живеалиштето на оној, кој не знае за Бога.“