Job 13
1 „Ете, сето тоа окото мое го виде, увото мое го чу и го разбра.
2 Колку што знаете вие, знам и јас; не сум подолу од вас.
3 Но јас кон Седржителот би сакал да говорам, би сакал со Бога да се соочам.
4 Зашто вие сте ковачи на лаги; сите вие сте бесполезни лечители.
5 Кога би знаеле да молчите, би било тоа ваша најголема мудрост.
6 Ислушајте го мојот приговор и проникнете во жалбите на усните мои.
7 Требаше ли да говорите заради Бога неправда и заради Него да говорите лага?
8 Требаше ли да бидете пристрасни кон Него и за Бога така да се препирате?
9 Добро ли ќе биде, Тој да ве испитува? Ќе Го измамите ли како што се измамува човек?
10 Тој строго ќе ве казни, иако скришно лицемерите.
11 Зар големината Негова не ве плаши, и страв од Него не ве обзема?
12 Вашите забелешки прилегаат на пепел; вашата одбрана е глинена ограда.
13 Молкнете пред мене, а јас ќе говорам што и да ме снајде.
14 Зар јас самиот да си го раскинувам со забите телото свое? И душата своја да си ја ставам в рака?
15 Тој нека ме убие, немам што повеќе да загубам; само сакам однесувањето мое пред лицето Негово да го оправдам.
16 И тоа ми е веќе за спасение, бидејќи безбожник нема да се јави пред лицето Негово.
17 Ислушајте ги внимателно зборовите мои и објасненијата мои со ушите ваши.
18 Ете, започнав судска постапка; знам дека ќе бидам прав.
19 Кој има сила да ме надвие? Потоа ќе молкнам и ќе го испуштам духот.
20 Само две работи направи за мене, и тогаш јас нема да се кријам од Твоето лице;
21 тргни ја од мене раката Своја, и Твојот ужас да не ме потресува.
22 Тогаш прашувај ме, и јас ќе одговарам; или јас да прашувам, а Ти да одговараш.
23 Колку се пороците и гревовите мои? Покажи ми го беззаконието мое и гревот мој.
24 Зошто го криеш сега лицето Свое од мене и ме сметаш за Твој непријател?
25 Зошто со страв го мачиш од ветрот скинатиот лист, зошто ја гониш сувата сламка?
26 Зошто пишуваш против мене горчливи пресуди и ми ги сметаш гревовите на младоста моја,
27 ги тураш во клада нозете мои и ги демнеш сите мои патишта, — ги испитуваш трагите на нозете мои?
28 А животот мој како изгниено дрво се распаѓа, како облека од молци изедена.“