Isaiah 59— 2006

¹Ете, раката на Господ не се скусила, та да не може да спасува, и увото Негово не отврднало, та да не може да слуша.

²Но беззаконијата ваши ве разделија од вашиот Бог, и гревовите ваши прават да го сокрива лицето Свое од вас, за да не слуша.

³Зашто рацете ваши се осквернети со крв, а прстите ваши — со беззаконие; устата ваша говори лага, јазикот ваш искажува неправда.

⁴Никој не го крева гласот за правда, и никој не се застапува за вистина: се надеваат на суетното и говорат лага, зачнуваат зло и раѓаат беззаконие;

⁵несат змиски јајца и ткаат пајажина; кој ќе ги изеде јајцата нивни — умира, ако, пак, ги скрши — отровна змија ќе исползи — од нив.

⁶Пајажините нивни не ги бива за облека, нема да се покријат со изра­ботката своја; делата нивни се дела не­праведни, а насилството е во рацете нивни.

⁷Нозете нивни трчаат кон зло, брзаат да пролеваат невина крв; мислите нивни — се мисли нечесни; по патеките нивни — опустошување и погибел.

⁸Тие не го знаат патот на мирот и на патеките нивни нема правда; патиштата им се искривени, и никој, кој оди по нив, не знае за мир.

⁹Затоа е и далеку од нас справедли­воста, правдата не стигнува до нас: чекаме видело, а тоа темнина, — светлина, а одиме во мрак.

¹⁰Го пипкаме ѕидот како слепи, одиме со пипкање како без очи; на пладне се сопнуваме како во мрак, меѓу живите сме како мртви.

¹¹Сите рикаме како мечки и стенкаме како гулаби, чекаме суд, а него го нема, — спасение, но тоа е далеку од нас.

¹²Зашто престапите наши пред Тебе се многубројни, гревовите наши сведо­чат против нас; со нас се престапите наши, беззаконијата наши ги знаеме.

¹³Ние изневеривме и се одрековме од Господ и отстапивме од нашиот Бог; говоревме клевета и насилство, зачну­вавме и раѓавме од срцата наши лажли­ви зборови.

¹⁴И справедливоста отстапи назад, а правдата застана далеку; зашто вистината се сопна на плоштадот, чесноста не можеше да влезе.

¹⁵И исчезна вистината, а кој се одда­лечува од злото, се изложува на ограбување. И Господ го виде тоа; и на очите не Му беше мило што нема правда.

¹⁶И виде дека немаше човек, се чудеше дека немаше застапник; тогаш Неговата рака Му помогна и правдата Негова Го поддржа.

¹⁷И ја облече врз Себе правдата како оклоп, а на главата Своја го стави шле­мот на спасението; и се облече во ко­шула на одмазда како во облека, се покри со ревност како со наметка.

¹⁸Според делата, според делата ќе им даде Тој на противниците Свои — со ја­рост, на непријателите Свои — со одмазда, на островите ќе им го даде заслу­женото.

¹⁹И ќе се уплашат на запад од името на Господ, на исток — од славата Негова. Ако непријателот надојде како река, — духот на Господ ќе го истера.

²⁰И ќе дојде Искупителот за Сион и за синовите Јаковови, кои се одвратиле од нечесноста, вели Господ.

²¹И еве го заветот Мој со нив, вели Господ: Духот Мој, Кој е врз тебе, и зборовите Мои, што ги вложив во устата твоја, нема да излезат од устата тво­ја, од устата на потомството твое и од устата на потомците на твоето потом­ство, вели Господ, отсега и довека.