Isaiah 3
1 Ете, Господ Бог Саваот ќе го одземе од Ерусалим и од Јуда жезолот и помошта, секоја поткрепа во леб и вода,
2 храбар водач и војник, судија и пророк, јасновидец и старец,
3 војсководец и големец, советник, мудар уметник и вешт говорник.
4 Ќе им дадам момчиња за началници, и деца ќе владеат над нив.
5 А во народот еден ќе угнетува друг, и секој — својот ближен; момче бесрамно ќе се прави голем пред старец и простак — пред големец.
6 Тогаш човек ќе се фати за братот свој, во челадта на татко си свој и ќе рече: „Ти имаш наметка, биди ни водач, и овие урнатини нека бидат под твоја рака.“
7 А тој со клетва ќе рече: „Не можам да ги излекувам раните на народот; и во мојата куќа нема ни леб, ни облека: не правете ме водач на народот.“
8 Така пропадна Ерусалим, и падна Јуда, зашто јазикот нивни и делата нивни се против Господ, навредливи пред очите на Неговата слава.
9 Изразот на лицето нивно сведочи против нив, а за гревот свој тие кажуваат отворено, како содомците, не кријат: тешко на душата нивна! Сами на себеси навлекуваат зло.
10 Кажете му на праведникот: „Блазе му, зашто тој ќе ги јаде плодовите на делата свои;
11 а на беззаконикот — тешко нему, зашто врз него ќе паднат делата на рацете негови!
12 Угнетувачи на Мојот народ се децата, и жени владеат над него. Народе Мој, твоите водачи те доведуваат до заблуда и го раскопуваат патот по кој одиш.“
13 Се крена Господ на суд — и стои, за да го суди народот.
14 Господ влегува во суд со старешините на Својот народ и со неговите кнезови: вие го опустошивте лозјето; ограбеното од сиромасите е во вашите куќи.
15 „Зошто го угнетувате народот Мој и ги газите сиромасите?“ вели Господ Бог Саваот.
16 Потоа рече Господ: „Поради тоа што ќерките сионски се гордеат и одат со исправени вратови, што освојуваат со погледите, и ситно одат и со веришки на нозете тропкаат,
17 Господ ќе го оголи темето на ќерките сионски, и ќе го открие срамот нивни.“
18 Во оној ден Господ ќе ги одземе убавите веришки на нозете, секакви шнолички и полумесечинки,
19 обетки, ѓерданчиња и ладила,
20 превези, гривни и појаси, стакленца со мириси и уметнички украси,
21 прстење и алки за нос,
22 горна облека и долна, шамичиња,
23 светли тенки наметки, кошули, забратки и покривала.
24 И наместо пријатен мирис ќе има смрад и место појас — јаже, место кадрени коси — ќелави глави, наместо широка наметка — тесно вреќиште, место убавина — лузна.
25 Мажите твои ќе паднат од меч, а јунаците твои — во битка,
26 и портите на престолнината ќе воздивнуваат и ќе плачат, а таа ќе седи напуштена на земјата.