Isaiah 24
1 Ете, Господ ја опустошува земјата и ја прави неплодна; ја изобличува и ги распрснува оние што живеат на неа.
2 Со свештеникот ќе стане исто што и со народот, — со слугата, — исто што и со господарот негов; со слугинката, исто што — и со господарката нејзина; со купувачот, исто што и со продавачот; со оној, кој ќе земе на заем, исто што, и со оној кој дава на заем; со оној, кој дава со интерес — исто што и со оној кој зема под интерес.
3 Земјата ќе опустоши до крај и целата ќе биде ограбена, зашто Господ го изрече тоа слово.
4 Тагува, нажалена е земјата; опаднала, тажна е вселената; небото пропаѓа заедно со Земјата.
5 И земјата е осквернета под жителите свои, зашто тие ги прекршија законите, го изменија уставот, го нарушија вечниот завет.
6 Затоа проклетство ја јаде земјата, а жителите нејзини трпат казна; затоа се намалени жителите земни, малку луѓе останаа.
7 Плаче гроздовиот сок; боледува лозата; воздивнуваат сите што се веселеа од срце.
8 Престана веселбата со тимпани; молкна вревата на оние што се веселеа; стивнаа звуците на харфите;
9 не пијат повеќе вино со песни; горчлив е жестокиот пијалак за оние што го пијат,
10 разорен е запустениот град; сите куќи се затворени, не може да се влезе.
11 Плачат за вино по улиците; исчезна секаква радост; изгонета е секаква веселба од земјата.
12 Во градот остана само пустош, портите се искршени.
13 А среде земјата, меѓу народите, ќе биде истото, што станува кога маслинки тресат или паберки по гроздобер.
14 Тие ќе го кренат гласот свој, ќе ликуваат во величието на Господ, силно ќе воскликнуваат од морето.
15 И така, славете Го Господа на исток, по островите морски — славете Го името на Господ, Бог Израелов.
16 Од крајот на земјата слушаме песна: „Слава на Праведниот!“ Но јас реков: „Тешко мене, тешко мене! Злодејци зло вршат, на зол начин дејствуваат злодејците.
17 Ужас, јама и стапица за тебе, жителе на земјата!“
18 Тогаш, оној што ќе избега од викот на ужасот, ќе падне во јама; и кој ќе излезе од јамата, ќе падне во стапица; зашто прозорците од небесната височина ќе се отворат, и основите на земјата ќе се разнишаат.
19 Земјата се разрушува, земјата се распаѓа, земјата е силно разнишана;
20 земјата се ниша како пијана и се лула како лулка, и беззаконието ѝ тежи врз неа; таа ќе падне — и повеќе нема да стане.
21 И во тој ден Господ ќе ја казни небесната војска во висините, и земните царства на земјата.
22 И ќе бидат собрани наедно како затвореници во затвор, и ќе бидат заклучени во темница и по многу денови ќе бидат казнети.
23 Тогаш месечината ќе поцрвени, и сонцето ќе се засрами, кога Господ Саваот ќе се зацари на гората Сион и во Ерусалим, и пред неговите старешини ќе покаже слава.