Hosea 7— 2006

¹Штом ќе посакам да го излечам Израел, се открива неправдата на Ефрем и злосторството на Самарија, зашто тие лажат, и крадец провалува, и разбојник граби по улиците.

²И не помислуваат во срцето свое дека Јас ги помнам сите нивни беззаконија; а сега ги обиколија нивните де­ла; пред лицето Мое се.

³Со злосторства го веселат царот свој и со лагите свои — кнезовите.

⁴Од прељубодејство тие сите горат како печка вжарена која пекарот по­веќе не ја разгорува, додека не го замеси тестото, и тоа скисне.

⁵„Денот е на царот наш!“ — велат кнезовите, опијанети од вино, а тој се ракува со опијанетите.

⁶Од сплетките нивни срцето им се вжарува како печка: гневот тлее во нив цела ноќ, а утрината се разгорува како огнен пламен.

⁷Тие сите се распалени како фурна и си ги голтаат судиите свои; нивните цареви паѓаат и никој од нив не вика кон Мене.

⁸Ефрем се смешал со народите, и станал како пита непревртена.

⁹Туѓинци му ја одземаат силата негова, но тој не забележува, косата му по­белела, а тој не знае.

¹⁰И гордоста на Израел сведочи против нив — и покрај сето тоа не се обра­ќаат кон Господ, својот Бог, и не Го бараат.

¹¹А Ефрем стана како глупав гулаб — без разум: ги повикуваат Египќаните на помош, а потоа се приклонуваат кон Асирија.

¹²Каде и да појдат, Јас ќе ја фрлам мрежата Своја врз нив; како птици не­бески ќе ги кутнам; ќе ги казнам, како што беше речено во нивното собрание.

¹³Тешко ним, зашто отстапија од Мене; погибел за нив, зашто се одметнаа од Мене. Јас ги спасував, а тие Ме лажеа.

¹⁴А не повикаа кон Мене од сѐ срце, кога пискаа по леглата свои; ридаа на своите постели заради леб и вино, а против Мене се бунтуваа.

¹⁵Додека Јас ги поткрепував и им да­вав сила, тие коваа зло против Мене.

¹⁶Тие се свртуваа кон лажни богови; станаа како скршен лак. Заради нивната горделивост, кнезовите ќе им изгинат од меч, а Египќаните ќе им се смеат.