Hosea 12— 2006

¹Ефрем Ме опкружил со лаги, а домот Израелов — со измами; но Јуда сѐ уште се држи за Бога, и верен Му е на Светецот.

²Ефрем пасе ветар и трча кон ис­точниот ветар, по цел ден си ги намно­жува лагите и насилствата, склучува сојуз со Ашур, а во Египет праќа масло.

³Но и со Јуда Господ ќе има суд — Тој ќе го казни и Јаков за постапките него­ви, и Ќе му плати според делата негови.

⁴Уште во утробата мајчина тој го по­тиснуваше брата си, а кога порасна, тој се бореше и со Бога.

⁵Тој се бореше против ангел — и го победи; заплака и Го замоли; во Ветил Тој нѐ најде и таму зборуваше со нас.

⁶А Господ е Бог над силите; Јахве е името Негово.

⁷Врати се и ти кон својот Бог; биди милостив и справедлив, и секогаш надевај се на твојот Бог.

⁸Хананецот има неверни мерила во раката своја и сака да онеправдува.

⁹И Ефрем вели: „Сепак се збогатив, насобрав многу имот, макар што во сите мои работи не можат да најдат ништо незаконско, што би било грев.“

¹⁰Јас сум твојот Господ Бог уште од земјата египетска: пак ќе те населам да седиш во колиби како во деновите на празникот.

¹¹Јас им зборував на пророците и ги умножував виденијата, а и преку пророците ќе донесам уништување.

¹²Во Галаад има беззаконија, тие ќе бидат уништени. Во Гилгал колат за жртви телци, а жртвениците им стојат како купишта камења на меѓите од нивните ниви.

¹³Избега Јаков во Арам и Израел служеше за жена, а за жена и овци па­сеше.

¹⁴Преку пророк го изведе Господ Израел од Египет и преку пророк Тој го пазеше.

¹⁵Ефрем многу Го разгневи Господа, па затоа Господ ќе ја остави крвта негова на него, и ќе му плати за неговите навреди.