Hebrews 2— 2006

¹Затоа треба да бидеме нарочно внима­телни кон она што го чувме за да не отпаднеме некако.

²Зашто, ако реченото слово преку ан­гелите се покажа верно, и ако секој престап и секоја непослушност прими праведна казна,

³како ли тогаш ќе се извлечеме ако занемариме такво големо спасение кое, најнапред проповедано од Господ, се потврди од оние што го беа чуле од Него,

⁴кога и Бог им го потврди сведош­тво­то со знаци и чудеса, со разни силни де­ла и со раздавање дарови преку Светиот Дух по Негова волја.

⁵Зашто Бог не им ја потчини на анге­лите идната вселена за која зборуваме,

⁶туку, напротив — некој посведочил зборувајќи: „Што е човекот да мислиш на него, синот човечки, та да се грижиш за него?

⁷Си го направил за кратко малку по­долен од ангелите, но со слава и чест си го овенчал и си го поставил над делата од Твоите раце;

⁸сѐ си потчинил под нозете негови.“ А кога сѐ му потчини, ништо не му ос­тави непотчинето; но сега уште не гле­даме дека сѐ му е потчинето.

⁹А гледаме дека Исус Христос, Кој за кратко време беше поставен пониско од ангелите, поради претрпената смрт беше овенчан со слава и чест, та, по Божјата благодат, Тој да вкуси смрт за сите.

¹⁰Зашто Му прилегаше на Оној, поради Кого е сѐ и од Кого е сѐ, при донесувањето на многубројните чеда во слава, преку страдања да го усоврши Зачетникот на нивното спасение.

¹¹Бидејќи и Оној што осветува, и оние што се осветуваат, сите се од Еден; и за­тоа Исус не се срамува да ги нарече браќа, велејќи:

¹²„Ќе го возвестам името Твое меѓу браќата Мои, среде собранието ќе Те славам.“

¹³И пак: „Јас ќе се надевам на Него.“ И одново: „Ете Ме Мене и децата Мои што Ми ги даде Бог.“

¹⁴А бидејќи децата се учесници во телото и крвта, така и Тој зеде еднакво учество во тоа, та преку смртта да го победи оној што ја има власта над смртта, односно ѓаволот;

¹⁵па да ги ослободи оние што од страв пред смртта преку целиот живот беа подложени на ропство.

¹⁶Зашто јасно е дека Тој не дојде да им помогне на ангелите, туку на Авра­амовите потомци;

¹⁷затоа Тој мораше во сѐ да личи на браќата, па да биде милостив и верен првосвештеник пред Бога, за да ги очисти гревовите на народот.

¹⁸Зашто во она, што Сам претрпе, откако беше искушан, во тоа ќе може и на искушуваните да им помогне.