Genesis 25
1 А Авраам зеде втора жена, по име Кетура.
2 И таа му ги роди Зимран, Јокшан, Медан, Мидјан, Јишбак и Шуах.
3 Јокшан ги роди Сева и Дедан. А Деданови синови беа Ашурим, Летушим и Леумим.
4 А синови Мидјанови: Ефа, Ефер, Ханох, Авида и Елдаа. Сите тие беа потомци Кетурини.
5 А Авраам сиот свој имот му го даде на Исак.
6 На синовите, пак, од своите наложници им даде Авраам подароци, и, уште додека беше жив, ги испрати на исток, во источната земја — далеку од синот негов Исак.
7 А деновите на Авраамовиот живот, што го поживеа, беа сто седумдесет и пет години.
8 И откако издивна, умре Авраам во среќна старост, престар и сит од животот, и се прибра кај народот свој.
9 А го погребаа неговите синови, Исак и Исмаил, во пештерата Махпела, во нивата на Ефрон, синот на Хитиецот Цохар, што се наоѓаше спроти Мамре;
10 на нивата, што ја беше купил Авраам од синовите Хетеови, таму беше погребан Авраам со жена му Сара.
11 А по смртта Авраамова го благослови Бог Исак, синот негов. Исак живееше, пак, во Беер Лахај Рои.
12 Еве го родословието на Исмаил, синот Авраамов, кого му го роди на Авраам Агара Египќанката, слугинката на Сара.
13 Ова се имињата на синовите Јишмаелови, како што ги именуваа во родовите нивни: првенецот Јишмаелов е Навајот, па Кедар, Адбеел и Мивсам,
14 потоа Мишма, Дума и Маса,
15 Адад, Тема, Јетур, Нафиш и Кедма.
16 Тоа се синовите Јишмаелови, и тоа се имињата нивни според селата и градовите нивни. Тоа се племињата нивни.
17 А деновите на животот Јишмаелов се сто триесет и седум години. Потоа издивна и умре, и се прибра при својот род.
18 Тие живееја од Хавила дури до Сур, што е пред Египет, на патот кон Асирија. Тие се населија спроти сите браќа свои.
19 А ова е родословието на Исак, синот Авраамов: Авраам го роди Исака.
20 А Исак имаше четириесет години кога се ожени со Ревека, ќерката на Арамеецот Ветуил од Месопотамија, сестра на Арамеецот Лаван.
21 И Исак Му се помоли на Господ за жената своја, бидејќи таа беше неплодна; и Господ го чу, па Ревека, жената негова, зачна.
22 Но децата се удираа едно со друго во утробата нејзина, и таа рече: „Ако биде така, зошто ми е ова?“ И отиде да Го праша Господа.
23 А Господ ѝ рече: „Две племиња има во утробата твоја, и два народа ќе излезат од тебе; едниот народ ќе биде посилен од другиот и поголемиот ќе му служи на помалиот.“
24 И дојде времето да роди, а ете — близнаци во утробата нејзина.
25 Излезе синот првенец црвен, целиот рунтав како руно; и му дадоа име Исав.
26 А потоа излезе брат му, држејќи го Исав со рака за петата; нему му ставија име Јаков. А Исак имаше шеесет години, кога тие се родија.
27 И децата пораснаа: Исав стана вешт ловец и човек на полето, а Јаков човек кроток кој живееше во шатори.
28 Исак го сакаше Исав, зашто му се допаѓаше дивечот негов; а Ревека го сакаше Јаков.
29 Еднаш Јаков зготви јадење, и Исав дојде од полето уморен.
30 И му рече Исав на Јаков: „Дај ми да јадам од црвеното вариво, зашто сум уморен.“ Затоа му го дадоа прекарот Едом.
31 Но Јаков му рече: „Продај ми го денес првородството твое!“
32 А Исав одговори: „Еве, јас умирам, па што ќе ми е тоа првородство?“
33 Но Јаков му рече: „Заколни ми се уште сега!“ И тој му се заколна. И му го продаде своето првородство на Јаков.
34 И Јаков му даде на Исав леб и варена леќа, и тој јадеше и пиеше, па стана и си отиде. Така Исав го презре првородството свое.