Exodus 36
1 И започнаа да работат Веселеил и Охолијав и сите способни луѓе, на кои Господ им беше дал мудрост и знаење да разбираат и да работат секакви работи, потребни за светилиштето, сѐ како што беше заповедал Господ.
2 И ги повика Мојсеј Веселеил и Охолијав и сите мудри луѓе, на кои Бог им дал разум во срцето, и сите, кои од срце сакаа да се зафатат за дела што треба да се свршат.
3 И тие ги зедоа од Мојсеј сите дарови што ги беа принеле синовите израелски за потребите на светилиштето за да се работи. А тие ги примаа уште и принесуваните дарови од оние што носеа секое утро.
4 Тогаш дојдоа сите вешти луѓе, што вршеа работи за светилиштето, секој според својата работа, кој каква што работел,
5 па му рекоа на Мојсеј: „Народот принесува повеќе отколку што е потребно за да се направи, она што заповеда Господ.“
6 И Мојсеј разгласи во таборот, велејќи: „Ни маж ни жена да не принесува ништо повеќе како дар за светилиштето.“ И народот престана да принесува,
7 зашто имаше доста принесено за секакви работи што требаше да се направат, дури и преостануваше.
8 Тогаш сите вешти луѓе, кои се обврзаа да ја направат скинијата, приготвија десет платништа од пресукан лен и од сина, пурпурна и црвена волна и на нив направија уметнички извезени херувими.
9 Должината на секое платниште изнесуваше дваесет и осум лакти, а ширината четири лакти; сите платништа беа со иста мерка.
10 И Веселеил ги состави петте платништа едно со друго, и другите пет платништа ги состави едно со друго.
11 И направи сини петлици по рабовите на едното платниште, каде што ќе се соединува со другото; такви направи тој и на работ од последното платниште, за да го соедини со другото.
12 Педесет петлици направи на едното платниште, каде што се соединува со другото; петлиците беа една спрема друга.
13 И направи педесет златни кукички и со кукичките состави едно платниште со друго. Така скинијата стана една целина.
14 Потоа направи платништа од козина за покривање на скинијата; единаесет такви платништа направи:
15 едно платниште беше долго триесет лакти, а широко четири лакти; една мерка беа сите единаесет платништа.
16 Па ги состави петте платништа одделно, а шесте платништа одделно.
17 И направи педесет петлици по работ од крајното платниште, каде што се соединува со другото, и педесет петлици направи по работ на другото платниште, за да се соединува со другото;
18 а направи и педесет кукички од бакар, за да се состави покривот, та да стане целина.
19 Потоа направи покрив за скинијата од овнешки кожи, црвени, а над неа друга — од сини кожи.
20 И направи штици за скинијата од дрвото шитим, што ќе стојат исправени;
21 секоја штица од по десет лакти долга, а лакот и половина широка;
22 секоја штица имаше по два клина, еден спроти друг; така направи тој на секоја штица од скинијата.
23 А вакви штици за скинијата направи дваесет за јужната страна:
24 и направи четириесет подножја сребрени за под дваесетте штици, по две подножја под секоја штица за двата клина нејзини, и по две подножја под другата штица за двата нејзини клина.
25 И за другата страна на скинијата, спрема север, направи дваесет штици,
26 и четириесет сребрени подножја: две подножја под едната штица и две подножја под другата штица.
27 А за задната страна на скинијата, кон запад, направи шест диреци;
28 направи уште две штици за аглите на скинијата од задната страна;
29 тие беа составени одоздола и одозгора со една алка; така направи тој со обете страни на двата агла;
30 и така имаше осум штици и шеснаесет подножја сребрени, по две подножја под секоја штица.
31 Потоа направи напречници од дрвото шитим: пет за штиците од едната страна на скинијата,
32 и пет напречници за штиците од другата страна на скинијата, и пет напречници за штиците од задната страна на скинијата.
33 А направи и внатрешна напречница што ќе иде преку средината на штиците од едниот до другиот крај;
34 диреците ги опкова со злато, а и алките, низ кои беа провлечени напречниците, ги направи од злато, па и напречниците ги опкова со злато.
35 Потоа направи завеса од сина, пурпурна и црвена волна и од пресукан лен и на неа направи херувими, уметнички извезени;
36 за неа направи и четири столба од дрвото шитим, и ги опкова со злато; и златни кукички за столбовите и им излеа четири подножја од сребро.
37 Направи потоа завеса за влезот во скинијата од сина, пурпурна и црвена волна и од пресукан лен, уметничка изработка,
38 и пет столбови за неа со кукичките нивни; врвовите на столбовите и нивните прстени ги обложи со злато, и направи пет подножја од бакар.