Exodus 30
1 „Направи и жртвеник за кадење, од дрвото шитим направи го:
2 должината нека му биде лакот, а ширината лакот, четвороаголен да биде, и два лакта висок; од него нека излегуваат роговите негови;
3 позлати го со чисто злато одозгора, од страните наоколу, и роговите негови; направи му златен венец наоколу;
4 под венецот на двата агли негови направи и две алки од злато; од двете страни направи ги; низ нив проври лостови, за да може да се носи жртвеникот;
5 лостовите направи ги од дрвото шитим, и опкови ги со злато.
6 Па стави го пред завесата, која виси пред ковчегот на заветот, спрема капакот што е врз ковчегот на заветот, од каде што ќе ти се јавувам тебе.
7 А Арон нека кади на него со кадиво со пријатна миризба; нека кади над него, секое утро, кога ги приготвува кандилата.
8 И кога ќе ги пали Арон кандилата навечер, нека кади над него; нека има постојано кадење пред Господ во поколенијата ваши.
9 Не принесувај над него никакво друго кадиво, ни сепаленици, ниту принос од леб, ни преливање не изливајте над него.
10 Арон еднаш во годината нека врши очистување над роговите негови; со крв од жртва за очистување на гревовите нека се врши очистување еднаш годишно во поколенијата ваши, зашто тоа е голема светиња пред Господ.“
11 И уште му рече Господ на Мојсеј, велејќи:
12 „Кога ќе ги пребројуваш синовите на Израел, при вршење преглед, секој нека даде на Господ откуп за душата своја, при нивното пребројување, и нема да има меѓу нив погубно уништување за време на пребројувањето;
13 оние што ќе доаѓаат за пребројување нека даваат по половина шекел, свештен шекел: во тој шекел има дваесет гери; а половината шекел е принос на Господ.
14 Сите што доаѓаат на пребројување, а имаат по дваесет години и нагоре, треба да даваат принос на Господ.
15 Богатиот да не дава повеќе, а сиромавиот да не дава помалку од половина шекел, кога давате принос на Господ за откуп на душите ваши.
16 А, откако ќе го собереш откупеното сребро од синовите на Израел, употребувај го за служење во скинијата. Тоа ќе им биде на синовите на Израел спомен пред Господ, за откуп на душите ваши!“
17 И уште му рече Господ на Мојсеј, велејќи:
18 „Направи и мијалник од бакар за миење и подножјето негово нека е од бакар; постави го меѓу скинијата и жртвеникот и налеј вода во него;
19 и Арон и синовите негови од него нека ги мијат рацете свои и нозете свои;
20 кога влегуваат во скинијата, нека се мијат со вода, за да не умрат; или кога пристапуваат кон жртвеникот, да Му служат и да Му принесуваат на Господ жртва;
21 тогаш нека ги мијат рацете свои и нозете свои, за да не умрат. Тоа нека им биде наредба вечна, нему и на потомството негово по него.“
22 Му рече Господ уште на Мојсеј, велејќи:
23 „Земи мириси најубави: смирна чиста — петстотини шекели, миризлив цимет половина од тоа — двесте и педесет, и трстика миризлива — исто така двесте и педесет,
24 касија — петстотини шекели, според свештениот шекел, и маслиново масло еден ин;
25 и од тоа направи масло — миро за свето помазание; мирото за свето помазание да биде направено со умешноста на мироварец; тоа нека биде миро за свето помазание.
26 Со него помажи ја скинијата на собранието и ковчегот на заветот
27 и трпезата и сиот нејзин прибор, и светилникот и сите делови негови, и жртвеникот за кадење;
28 и жртвеникот, на кој се принесува жртва сепаленица, и сиот негов прибор, и мијалникот и подножјето негово.
29 Така ќе ги осветиш, па ќе станат голема светиња и сѐ што ќе се допре до нив, ќе се освети.
30 Помажи го и Арон и синовите негови, и посвети ги, за да Ми бидат свештеници.
31 А на синовите израелски кажи им: ова масло за помазание нека Ми биде миро за свето помазание за сите поколенија ваши.
32 Телото на обичен човек нека не се помажува со него, и не правете за себе такво миро какво што е ова. Тоа е светиња и нека остане светиња за вас.
33 Ако некој направи такво миро, или помаже друг со него, нека биде истребен од народот свој.“
34 И му рече Господ на Мојсеј: „Земи благопријатни мириси: стакта, оникс, халван миризлив, и чист темјан, од сите работи во еднакви делови,
35 и од нив направи кадиво, миро варено, со умешноста на мироварец, чисто и свето.
36 Па, откако ќе го истолчиш ситно, ставај од него во скинијата пред ковчегот на заветот, каде што ќе ти се јавувам; тоа нека ви биде голема светост.
37 А такво кадиво, какво што ќе го направиш, немојте да правите за себе; тоа нека ви биде светост пред Господ.
38 А, ако некој го направи тоа, за да кади со него, нека биде истребен од народот свој.“