Exodus 29
1 „А еве што да направиш над нив, за да ги посветиш за Мои свештеници: земи теле од говедата и два овна здрави,
2 и бесквасни лебови, бесквасни погачки замесени со масло, и питки бесквасни намачкани со масло; од пченично бело брашно направи ги.
3 Стави ги во една кошница, и принеси ги со кошницата, заедно со телето и двата овна.
4 Доведи го Арон и синовите негови пред влезот на скинијата, и измиј ги со вода.
5 А откако ќе ги земеш одеждите, облечи го Арон, во хитон и во наметка, во ефод и во наградник и опаши го преку ефодот;
6 стави му го на глава кидарот, а на кидарот прицврсти го венецот на светоста.
7 И земи масло за помазание, излеј на главата негова и помажи го.
8 Потоа доведи ги синовите негови и облечи ги во хитоните.
9 И опаши ги со појаси, Арон и неговите синови, и стави им ги превивките на главата, па свештенството нека им припаѓа вечно. Така ќе ги посветиш рацете на Арон и на неговите синови.
10 Потоа доведи го телето пред вратата на скинијата, и Арон и синовите негови нека ги положат рацете свои врз главата на телето.
11 И заколи го телето пред Господ, пред влезот во скинијата,
12 и земи крв од телето и со твојот прст помажи ги роговите на жртвеникот, а остатокот од крвта, сета излиј ја во подножјето на жртвеникот.
13 Потоа земи го сиот лој што ја обвива внатрешноста, кошулката на црниот дроб и обата бубрега со лојот околу нив, и запали ги на жртвеникот.
14 А месото од телето, кожата негова и нечистотиите изгори ги на оган надвор од логорот. Тоа е жртва за грев.
15 Потоа земи го едниот овен, и Арон и синовите негови нека ги положат рацете свои врз главата на овенот;
16 па заколи го овенот, земи крв од него и со неа полиј го жртвеникот од сите страни;
17 овенот, пак, исечи го на делови, измиј ја внатрешноста и нозете негови, и стави ги врз расечените делови со главата,
18 и изгори го целиот овен на жртвеникот. Тоа е жртва сепаленица пред Господ, мирис благопријатен, жртва на Господ.
19 Земи го потоа и другиот овен, та Арон и синовите негови нека ги положат рацете свои на главата на овенот;
20 заколи го овенот и земи од неговата крв, па помажи го со неа крајчето од десното уво на Арон, и крајчето од десното уво на неговите синови, а и палецот на десната рака нивна, и палецот од десната нога нивна; а со крвта, што ќе преостане, попрскај го жртвеникот од сите страни.
21 Потоа земи од крвта, што е на жртвеникот и масло за помазание, и попрскај го Арон и одеждите негови, и синовите негови и одеждите нивни — па ќе бидат осветени тој и одеждите негови, и синовите негови и одеждите на синовите негови со него.
22 Освен тоа, земи лој од овенот и опашката негова, и лојот што ја обвива внатрешноста негова, како и кошулката од црниот дроб и обата бубрега и лојот што е на нив, и десната плешка;
23 и еден леб и една погачка со масло, и една питка од кошницата со бесквасни лебови, приложена пред Господ.
24 Сето тоа стави го врз рацете на Арон и врз рацете на синовите негови, и принеси го тоа со нишање пред Господ.
25 Потоа земи им го тоа од рацете нивни, и изгори го на жртвеникот, со жртвата сепаленица, за да биде мирисот благопријатен пред Господ: тоа е принос пред Господ.
26 И земи ги градите од овенот за Ароновото посветување и принеси ги со нишање пред Господ — и тоа ќе биде твој дел.
27 И освети ги градите од приносот, што беа нишани, и плешката на вознесението што беше вознесена, од овенот за посветување на Арон и на синовите негови;
28 и тоа нека биде за Арон и за синовите негови вечен дел од синовите на Израел, бидејќи тоа е вознесение; тоа вознесение треба да го прават при благодарствените жртви; нивното вознесение е дар за Господ.
29 А светите одежди Аронови по него нека преминат на синовите негови, за да бидат во нив помазувани и во нив да се посветуваат за свештеници.
30 Седум дена нека се облекува во нив свештеник од синовите негови, оној, кој на неговото место ќе биде свештеник, кој ќе влегува во скинијата за да служи во светилиштето.
31 А овенот за посветување земи го и месото негово свари го на свето место;
32 и Арон и синовите негови нека го изедат месото од тој овен со лебовите од кошницата при влезот во скинијата.
33 Зашто преку тоа е извршено очистување и послужило за нивното посветување во свештенство; човек друг да не јаде, зашто тоа е света работа;
34 а и ако остане нешто од месото на жртвата за посветување, или од лебовите до изутрина, остатокот изгори го на оган; тоа не треба да се јаде, зашто е светиња.
35 И направи така со Арон и со синовите негови сѐ онака како што ти заповедав. Седум дена посветувај ги рацете нивни.
36 Теле заради гревовите да принесуваш секој ден за очистување; и жртва за грев да принесуваш врз жртвеникот за да го очистиш; и помажи го за да биде осветен.
37 Седум дена ќе го очистуваш жртвеникот и ќе го осветуваш, и жртвеникот ќе биде голема светиња; секој кој ќе се допре до жртвеникот, ќе се освети.
38 А еве што ќе принесуваш на жртвеникот: две јагниња стари една година, секој ден без прекин.
39 Едното јагне принесувај го наутро, а другото принесувај го навечер;
40 и уште по една десетина ефа пченично брашно измешано со четврт ин исцедено масло, а за преливање — четврт ин вино, за едно јагне;
41 а другото јагне принесувај го навечер: со принос од брашно како утринскиот и со исто такво преливање принесувај го, како благопријатен мирис, жртва на Господ.
42 Тоа нека биде постојана жртва сепаленица во поколенијата ваши пред вратата од скинијата, пред Господ, каде што ќе ти се јавувам, за да зборувам со тебе.
43 И таму ќе им се јавувам на синовите израелски, и ќе се освети тоа место со славата Моја.
44 А ќе ги осветам скинијата и жртвеникот; и Арон и синовите негови ќе ги осветам, за да Ми свештенодејствуваат.
45 Ќе пребивам меѓу синовите израелски и ќе им бидам Бог,
46 и ќе познаат дека Јас сум Господ, Бог нивни, Кој ги изведе од земјата египетска за да пребива меѓу нив. Јас сум Господ, нивниот Бог.“