Deuteronomy 10— 2006

¹Тогаш Господ ми рече: „Исечи две камени плочи, слични на поранешните, и искачи се кај Мене на планината, и направи дрвен ковчег.

²А Јас ќе ги напишам на плочите оние зборови што беа напишани на поранешните плочи, а кои ти ги скрши; и положи ги во ковчегот.“

³И направив ковчег од дрвото ши­тим, па исеков две камени плочи, како поранешните, и отидов на планината со двете плочи во раце.

⁴И ги напиша Тој на плочите, како што беше напишано порано; оние десет заповеди, што ви ги кажа Господ на планината среде огнот во денот на собранието, и ми ги предаде Господ.

⁵Јас се свртев и слегов од планината и ги положив плочите во ковчегот, што го бев направил, за да бидат тие таму, како што ми заповеда Господ.

⁶Потоа заминаа синовите израелски од изворот на синовите Јаканови кон Мосера; и таму умре Арон и беше по­гре­бан, а на местото негово свештеник стана синот негов Елеазар.

⁷Оттаму отидоа во Гудгода, а од Гудгода во Јатевата, во земјата со водни потоци.

⁸Тогаш Господ го оддели Левиевото племе, за да го носи ковчегот на заветот Господов, за да стои пред Господ и да Му служи, и да го велича името Негово, како што е тоа и до ден денес;

⁹поради тоа левитите немаат дел и наследство со браќата свои: Самиот Гос­под е нивни дел, како што им беше говорел Господ, твојот Бог.

¹⁰И престојував на планината, како и порано, четириесет дена и четириесет ноќи; Господ ме послуша и овој пат, и не посака Господ да ве погуби;

¹¹и Господ ми рече: „Стани, тргни на пат пред својот народ; нека отидат и нека ја населат земјата, за која им се заколнав на предците нивни дека ќе им ја дадам.“

¹²И сега, Израеле, што бара од тебе Господ, твојот Бог? Само да се плашиш од Господ, твојот Бог, да одиш по сите Негови патишта, да Го сакаш, и да Му служиш на Господ, твојот Бог, од сѐ срце и со сета душа;

¹³да ги пазиш заповедите на Господ, твојот Бог, и наредбите Негови, кои де­нес ти ги заповедам, за да ти биде добро.

¹⁴Ете, небото и небото над небесата, земјата и сѐ што е на неа, е на Господ, твојот Бог;

¹⁵но само предците ваши ги прими Господ и ги засака, и ве избра вас, нив­ното семе по нив, од сите народи, како што гледаш денес.

¹⁶И така, отстранете ја нечистотијата на вашето срце, и немојте да бидете во иднина тврдоглави;

¹⁷зашто Господ, вашиот Бог, е Бог на боговите и Господар на господарите, Бог голем, силен и страшен, Кој не гледа на лице и не зема дарови,

¹⁸Кој право суди, на сирак и на вдовица, го сака придојдениот и му дава леб и облека.

¹⁹Сакајте го и вие придојдениот, би­дејќи и вие самите бевте придојдени во египетската земја.

²⁰Плаши се од Господ, твојот Бог, и само Нему служи Му, кон Него при­врзи се и во Негово име колни се;

²¹Тој е твојата пофалба, Тој е твојот Бог, Кој поради тебе ги направи оние големи и славни дела, што ги видоа очите твои;

²²твоите предци дојдоа во Египет седумдесет души, а сега Господ, твојот Бог, те направи многуброен како ѕвез­дите небески.