2 Timothy 2— 2006

¹Чедо мое, зајакнувај во благодатта што ти е дадена од Христос Исус,

²и сѐ што си чул од мене пред многу сведоци, предај го на верни луѓе кои се способни и други да научат.

³Па така, поднесувај ги страдањата како добар војник на Исус Христос.

⁴Зашто никој кој служи како војник не се вплетува во работите на секојднев­ниот живот, за да му угоди на својот војсководач.

⁵А, ако пак, некој се натпреварува, нема да добие венец доколку не се борел според правилата.

⁶Земјоделецот што се труди прв тре­ба да вкуси од плодот.

⁷Размисли што ти зборувам и Господ ќе ти даде да разбереш сѐ!

⁸Спомнувај си Го Господ Исус Хрис­тос од Давидовото семе, Кој воскресна од мртвите, според моето Евангелие,

⁹поради кое страдам дури до окови, како злосторник. Но словото Божјо не може да се стави во окови.

¹⁰Затоа сѐ трпам заради избраните, за да добијат и тие спасение во Христос Исус со вечна слава.

¹¹Верни се зборовите: Ако со Него сме умреле, со Него и ќе живееме.

¹²Ако истраеме, со Него и ќе царува­ме. А ако се одречеме од Него, и Тој ќе се одрече од нас.

¹³Ако не сме верни, Тој останува ве­рен, бидејќи Сам Себе не може да се одрече.

¹⁴Ова напомнувај го заколнувајќи се пред Господ за да не се препираат, зашто препирките ништо не помагаат, а само им штетат на оние што слушаат.

¹⁵Погрижи се пред Бога да се до­ка­жеш како работник кој нема од што да се срами кога верно го проповеда словото на вистината.

¹⁶А од непристојни и празни зборови бегај, зашто тие ги водат луѓето уште повеќе кон безбожност.

¹⁷И словото нивно ќе се пренесува како жива рана. Такви се Именеј и Фи­лит,

¹⁸кои застранија од вистината, гово­рејќи дека воскресението веќе се збиднало, и со тоа им попречуваат во верата на некои.

¹⁹Но Божјата цврста основа стои непоколебливо, имајќи го овој печат: „Ги познава Господ оние кои се Негови“ и „Да отстапи од неправда секој што го изговара името Господово!“

²⁰Во голем дом има не само златни и сребрени садови, туку и дрвени и глине­ни; и едните се за почесна употреба, а другите за нечесна.

²¹И така, ако некој се очисти од тоа, тој ќе биде сад за почест, осветен, прис­пособен за употреба на господарот и приготвен за секое добро дело.

²²Одбегнувај ги, исто така, и мла­деш­ките копнежи, и стреми се кон праведноста, верата, љубовта, мирот со оние што Го повикуваат Господ од чисто срце!

²³Глупави и празни расправии избегнувај, знај дека тие породуваат кавги!

²⁴А слугата Господов не треба да вле­гува во расправии; туку да биде кроток кон сите, способен да поучува и да поднесува зло,

²⁵со кротост да ги превоспитува про­тив­ниците за да би можел Бог да им да­де покајание, за да ја познаат вистината,

²⁶и да се ослободат од мрежата на ѓа­волот кој ги уловил живи за да ја исполнуваат неговата волја.