1 Peter 4— 2006

¹Бидејќи, пак, Христос пострада со телото за нас, тогаш вооружете се вие со истата мисла; зашто кој ќе пос­трада со телото, тој прекинал со гревот,

²та преостанатото време на животот во телото да не го проживее веќе со чо­вечки похоти, туку според волјата Бож­ја.

³Зашто доволно е што минатото вре­ме на животот го поминавте во вршење волјата на незнабошците, живеејќи во нечистотија, во похоти, во пијанство, во прејадување, во препивање и во не­чес­тиво идолопоклонство.

⁴Затоа тие и се чудат што не се дру­жите со нив во тој ист неуреден живот, и хулат на вас.

⁵Но тие ќе одговараат пред Оној Кој е готов да им суди на живите и на мрт­вите.

⁶Зашто и на мртвите им беше про­по­ведано Евангелието да примат суд како луѓе по телото, а да живеат со духот по Бога.

⁷Но близу е крајот на сѐ. Па бидете мудри и бодри во молитвите.

⁸А пред сѐ, имајте постојано љубов меѓу себе; зашто „љубовта покрива многу гревови.“

⁹Бидете гостољубиви еден спрема друг без негодување.

¹⁰Служете си еден на друг, секој со дарбата што ја примил, како добри управители на разнообразната Божја благодат.

¹¹Ако некој говори, нека знае дека зборува Божји зборови; ако некој слу­жи, нека служи според силата која Бог ја дава, та во сѐ да се прослави Бог пре­ку Исус Христос, чија слава и владеење се вечни. Амин.

¹²Возљубени, не чудете се на огненото искушение, што ви се праќа за да ве испита, како нешто необично да ви се случува.

¹³Напротив. Ако учествувате во страдањата Христови, тогаш радувајте се, та кога ќе се јави Неговата слава да се зарадувате и развеселите.

¹⁴А ако ве укоруваат поради името Христово, блажени сте, зашто Духот на славата, Духот Божји почива на вас: тие, значи, на Него хулат, а вие — Го прославувате.

¹⁵Никој, пак, од вас да не страда како убиец, или крадец, или злосторник, ни­ту како оној што се меша во туѓи ра­бо­ти;

¹⁶но, ако страда како христијанин, да не се срамува, туку да Го прославува Бога за такво учество.

¹⁷Зашто време е да почне судот од Божјиот дом; а ако почне најнапред од нас, тогаш каков ли ќе им биде крајот на оние кои не му се покоруваат на Божјото Евангелие?

¹⁸И кога праведникот одвај се спасува, тогаш што ќе стане од без­бож­ни­ци­те и грешниците!?

¹⁹И така, оние што страдаат според волјата на Бога, нека Му ги предадат Нему, како на верен Создател, душите свои, правејќи добро.