1 Peter 3— 2006

¹А така и вие, жените, бидете им покорни на своите мажи, та, ако не­кои од нив не му се покоруваат на сло­вото, преку поведението на своите жени да се придобијат без приговор,

²кога ќе го видат вашиот чист и богобојазлив живот.

³Вашата убавина да биде не надво­решна, односно во плетењето на косите, китењето со злато или облекување на облеки,

⁴туку — внатрешна, во срцето на скриениот човек, во постојаност и тих дух, што е драгоцено пред Бога.

⁵Зашто така некогаш се украсуваа и светите жени, кои се надеваа на Бога и им се покоруваа на мажите свои,

⁶како што Сара го слушаше Авраам, нарекувајќи го господар. Вие сте нејзини чеда; ако правите добро, не плашете се од ништо.

⁷Така и вие, мажите, живејте со сво­ите жени во разбирање и почитувајте ги како послабо суштество и како со­наследници на благодатниот живот, за да не се појави препрека во молитвите ваши.

⁸А најпосле, бидете сите еднодушни, сочувствителни, братољубиви, милосрдни, дружељубиви, понизни;

⁹не враќајте зло за зло или навреда за навреда, туку, напротив: благословувај­те, знаејќи дека за тоа сте повикани за да наследите благослов.

¹⁰„Зашто, кој го сака животот и сака да види добри денови, нека го пази ја­зи­кот свој од зло, и усните негови да не зборуваат лаги.

¹¹Нека одбегнува зло и нека прави добро, нека бара мир и нека се стреми кон него —

¹²бидејќи очите на Господ се вперени кон праведните, и ушите Негови — кон нивните молитви, а лицето Господово е против оние кои прават зло за да ги истреби од земјата.“

¹³И кој ќе ви направи зло, ако пра­ви­те добро?

¹⁴Но, ако и страдате за правда, бла­жени сте; не плашете се од она од што тие се плашат и не бојте се;

¹⁵туку Господ Бог почитувајте Го во срцата свои; а бидете секогаш подготвени со кротост и страхопочит за одговор на секого кој од вас ќе побара сметка за вашата надеж.

¹⁶Имајте чиста совест, та со тоа, што ве напаѓаат како злосторници, да се посрамат тие што ве кудат поради вашиот добар живот во Христос.

¹⁷Зашто, ако ѝ е угодно на Божјата волја, подобро е да страдате правејќи добро, отколку вршејќи лошо.

¹⁸Бидејќи и Христос, за да нѐ доведе кај Бога, еднаш пострада за гревовите наши, праведник за неправедните; вис­тина, умре по тело, но оживеа со духот.

¹⁹Во него откако слезе, им проповеда и на духовите кои беа в затвор,

²⁰кои некогаш не се покорија кога Божјата долготрпеливост ги оче­ку­ваше, во времето на Ное, при правењето на ковчегот, во кој малкумина, од­нос­но осум души се спасија од водата.

²¹Образецот на таа вода — крштавањето, но не отстранувањето на телесната нечистотија, туку ветувањето на Бога добра совест — нѐ спасува сега и нас преку воскресението на Исус Христос,

²²Кој, откако се вознесе на небото, е оддесно на Бога, а Кому Му се покоруваат ангелите, властите и силите.