1 Peter 1— 2006

¹Петар, апостол на Исус Христос, до повратниците распрснати по Понт, Галатија, Кападокија, Азија и Витанија,

²избрани по предзнаењето на Бог Отецот, и осветени од Духот за пос­луш­ност и попрскување со крвта на Исус Христос: да ви се умножат благодатта и мирот!

³Благословен е Бог и Отецот на нашиот Господ Исус Христос, Кој по својата голема милост нѐ прероди преку воскресението на Исус Христос од мртвите за жива надеж,

⁴за наследство што не пропаѓа, чисто, кое не свенува, запазено на небесата за вас,

⁵кои Божјата сила преку верата ве сочувала за спасение, приготвено да се открие во последното време.

⁶Затоа радувајте се, макар што мо­же­би сега ќе треба малку и да тагувате по­ради разновидни искушенија,

⁷та вашата вера испитана да излезе подрагоцена од нетрајното злато, кое сепак се испробува преку оган, за по­фалба и чест и слава, кога ќе се појави Исус Христос,

⁸Кого Го сакате, иако не сте Го ви­де­ле, и во Кого верувајќи сега, а не гле­дај­ќи Го, се радувате со неискажлива и славна радост,

⁹примајќи ја крајната цел на вашата вера — спасението на душите.

¹⁰Тоа спасение го бараа и испитуваа пророците што прорекоа за вашата благодат.

¹¹Откако испитаа, во кое или какво време им јавуваше Духот Христов однапред, Кој беше во нив, сведочејќи за Христовите страдања и славата која иде по нив;

¹²ним им беше откриено дека тие не за самите себе служат, туку за вас со она што ви се јави сега вам преку оние кои го проповедаа Евангелието од не­бото преку Светиот Дух, и во кое копнеат да ѕирнат ангелите.

¹³Поради тоа, возљубени, препашете ги колковите на умот свој, бидете бодри и имајте целосна надеж дека ќе ви се принесе благодатта при јавувањето на Исус Христос.

¹⁴Како послушни чеда, не постапувај­те веќе според поранешните ваши похоти, кога бевте во незнаење.

¹⁵Но, по примерот на Светиот, Кој ве повика, и вие самите бидете свети во сите ваши постапки.

¹⁶Зашто напишано е: „Бидете свети, бидејќи Јас сум свет.“

¹⁷Ако Го нарекувате Отец Оној, Кој непристрасно секому му суди според делата, тогаш поминувајте го времето на својот живот во страхопочит,

¹⁸знаејќи дека со пропадливо сребро или злато не сте искупени од суетниот живот, кој ви се предаде од татковците ваши,

¹⁹туку со скапоцената крв на не­по­рочното и чисто Јагне — Христос,

²⁰Кој беше предназначен уште пред создавањето на светот, а се јави во последно време заради вас,

²¹кои преку Него поверувавте во Бо­га, Кој Го воскресна од мртвите и Му даде слава, та верата ваша и надежта да ви бидат во Бога.

²²Откако ги очистивте душите свои со послушност кон вистината преку Ду­хот, за нелицемерно братољубие, сакај­те се еден со друг постојано со чисто ср­це,

²³како преродени не од распадливо семе, туку од вечно преку словото на живиот Бог, Кој живее во сите векови.

²⁴Зашто телото е како трева, и секоја човечка слава — како цвет од трева: се исушува тревата, и цветот нејзин паѓа;

²⁵но словото Господово останува засекогаш. А тоа слово е Евангелието што ви беше објавено.