Job 28— WARMB

¹«Արդարեւ արծաթը իր երակը ունի Ու ոսկին իր զտուելու տեղը։

²Երկաթը հողէն կ’առնուի, Հանքէն պղինձ կ’ելլէ ։

³Մարդը խաւարին վախճան կը դնէ Ու ամէն բան կատարելապէս կը քննէ, Շատ ծածուկ պահուած քարերը՝ որոնք մահուան ստուերին մէջ են։

⁴Իր բնակած տեղին քով փոս կը բանայ. Ոտք չկոխած տեղը կը կախուին Ու մարդոցմէ հեռու կ’երերան։

⁵Երկրէն հաց կ’ելլէ Ու անոր տակ կրակի նման բաներ կը գտնուին։

⁶Անոր քարերը շափիւղաներու տեղ են Ու հոն ոսկիի աւազ կայ։

⁷Յափշտակող թռչունը անոր շաւիղը ճանչցաւ Ու անգղին աչքը զանիկա չտեսաւ։

⁸Վայրենի գազանները՝ ՝ հոն ոտք կոխած չեն, Առիւծը անկէ անցած չէ։

⁹Մարդը իր ձեռքը կ’երկնցնէ ապառաժներուն Ու լեռները հիմէն կը տապալէ։

¹⁰Ապառաժները ճեղքելով՝ անոնց մէջէն վտակներ կ’անցնէ. Անոր աչքը կը տեսնէ ամէն թանկագին բան։

¹¹Գետերը վազելէն կ’արգիլէ Ու գաղտուկ եղածը երեւան կը հանէ։

¹²Բայց իմաստութիւնը ո՞ւր կը գտնուի Ու հանճարին տեղը ո՞ւր է։

¹³Մարդը անոր յարգը չի գիտեր Ու կենդանիներուն երկրին մէջ չի գտնուիր։

¹⁴Անդունդը կ’ըսէ. ‘Անիկա իմ մէջս չէ’ Ու ծովը կ’ըսէ. ‘Իմ քովս չէ’։

¹⁵Զուտ ոսկիով ծախու չ’առնուիր Ու անոր արժէքին համար արծաթ չի կշռուիր,

¹⁶Ո՛չ Ոփիրին ոսկիով կը փոխուի, Ո՛չ ալ պատուական եղնգնաքարով ու շափիւղայով։

¹⁷Ոսկին ու ակնվանին չեն կրնար անոր հաւասարիլ։ Զուտ ոսկիէ ամաններով չեն փոխանակուիր։

¹⁸Բուստն ու բիւրեղը անոր քով չեն յիշուիր։ Իմաստութեան գինը յակինթներու գին էն աւելի բարձր է։

¹⁹Եթովպիայի տպազիոնին գինը անոր չի հաւասարիր Ու զուտ ոսկիով չի փոխուիր։

²⁰Ուրեմն իմաստութիւնը ուրկէ՞ կու գայ Ու հանճարին տեղը ո՞ւր է։

²¹Բոլոր ապրողներուն աչքերէն ծածկուած Ու երկնքի թռչուններէն պահուած է։

²²Կորուստն ու մահը կ’ըսեն. ‘Մենք անոր համբաւը մեր ականջներովը լսեր ենք’։

²³Աստուած կը ճանչնայ անոր ճամբան Ու անոր տեղը ինք գիտէ։

²⁴Քանզի մինչեւ երկրի ծայրերը կը դիտէ Ու բոլոր երկնքի տակ եղածը կը տեսնէ։

²⁵Երբ հովին կշիռ կը դնէր Ու ջուրերը չափով կը չափէր,

²⁶Երբ անձրեւին օրէնք Ու որոտումներուն ճամբայ կ’որոշէր,

²⁷Այն ատեն տեսաւ զանիկա ու յայտնեց Պատրաստեց զանիկա ու նաեւ քննեց

²⁸Ու մարդուն ըսաւ. ‘Ահա Տէրոջը վախն է իմաստութիւնը Ու չարութենէ ետ քաշուիլը հանճարն է’»։