Psalms 82
1 Սաղմոս Ասափի՝ օրհներգ
2 Աստվա՛ծ, ո՞վ է քեզ նման. Մի՛ լռիր ու մի՛ դադարիր, Աստվա՛ծ։
3 Ահա թշնամիներդ գոչեցին, Եվ ատելիներդ իրենց գլուխները բարձրացրին։
4 Քո ժողովրդի դեմ խորամանկություն մտածեցին. Խորհեցին քո խնամարկյալների դեմ
5 և ասացին. «Եկե՛ք վերացնենք նրանց ազգերի միջից, Որ այլևս չհիշվի անունը Իսրայելի»։
6 Մեկտեղ միաբանությամբ խորհեցին, Դաշինք կնքեցին քո դեմ.
7 Եդովմացիների բանակներն ու իսմայելացիները, Մովաբն ու հագարացիները,
8 Գեբաղը, Ամովնը, Ամաղեկը Եվ բոլոր այլազգիները՝ Ծուրի բնակիչներով հանդերձ։
9 Նաև Ասուրն էր եկել նրանց հետ. սրանք բոլորը Զորավիգ էին Ղովտի որդիներին։
10 Սրանց Մադիամի ու Սիսարի նմա՛ն արա, Հաբինի նման՝ Կիսոնի ձորերի մեջ։
11 Կոտորվեցին նրանք Դովրի ակունքներում Եվ եղան երկրի աղբի պես։
12 Նրանց իշխաններին արա՛ Որեբի, Էբի, Զեբեի, Սաղմանայի պես. նրանց բոլոր իշխաններին,
13 Որոնք ասացին. «Ժառանգենք Աստծու սրբությունը մեզ համար»։
14 Աստվա՛ծ իմ, նրանց արա՛ անիվի պես, Ինչպես եղեգ՝ հողմի դիմաց,
15 Ինչպես հուր, որ անտառն է այրում, Ինչպես բոց, որ լեռներն է կիզում։
16 Քո մրրիկով այսպես պիտի հալածես նրանց Եվ քո բարկությամբ խռովեցնես նրանց։
17 Անարգանքո՛վ լցրու նրանց երեսները, Որ քո անունը ցանկան, Տե՜ր,
18 Թող ամաչեն ու խռովվեն Հավիտյանս հավիտենից. Եվ կորչեն ամոթահար։
19 Թող իմանան, որ Տեր է քո անունը, Եվ դու ես միակ Բարձրյալը ողջ երկրի վրա։