Psalms 39
1 Դպրապետին։ Սաղմոս Դավթի
2 Համբերությամբ սպասեցի Տիրոջը, Եվ նայեց ինձ ու լսեց աղոթքս։
3 Ինձ հանեց տառապանքի հորից, կավի ու տիղմի միջից, Ժայռի վրա հաստատեց ոտքերս Եվ ուղղեց իմ ընթացքը։
4 Մի նոր օրհներգ դրեց բերանս՝ մեր Տիրոջ՝ Աստծու օրհներգը։ Շատերը պիտի տեսնեն ու վախենան և հուսան Տիրոջը։
5 Երանելի է այն մարդը, որի հույսը Տիրոջ անունն է. Նա չնայեց ունայնության և սուտ մոլորության։
6 Բազում են քո սքանչելիքները, Տե՛ր, Աստվա՛ծ իմ, Ոչ ոք նման չէ քեզ քո խորհուրդներում։ Պատմեցի ու խոսեցի որևէ թվից ավելի։
7 Զոհեր և պատարագներ չուզեցիր. լսողություն տվեցիր. Ողջակեզ և մեղքի համար զոհ չուզեցիր։
8 Այնժամ ասացի. «Ահավասիկ գալիս եմ. Գրքի մեջ գրված է իմ մասին»։
9 Կամքդ կատարել ուզեցի, Աստվա՛ծ իմ, Եվ օրենքներդ՝ իմ ներսում։
10 Ես կավետարանեմ քո արդարությունը մեծ հավաքներում. Ահա շրթունքներս չեմ կտրում քեզնից։ Ո՜վ Տեր, դու գիտես,
11 որ քո արդարությունը Չեմ ծածկել իմ սրտում, Նաև քո ճշմարտությունն ու քեզնով փրկությունը։ Ասացի և չթաքցրի քո ողորմությունն Ու քո ճշմարտությունը մեծ ժողովից։
12 Իսկ դու, Տե՜ր, քո գթությունն ինձնից հեռու մի՛ պահիր, Քո ողորմությունն ու ճշմարտությունը թող միշտ օգնեն ինձ։
13 Ինձ պաշարեցին չարերը, որոնց թիվ չկար, Իմ անօրենությունները հասան ինձ, և ես չկարողացա տեսնել։ Գլխիս մազերից ավելի շատացան, և սիրտս լքեց ինձ։
14 Տե՛ր, կամեցի՛ր փրկել ինձ և նայի՛ր, որ օգնես ինձ, Տե՜ր։
15 Թող ամաչեն և ամոթահար լինեն նրանք, Ովքեր ուզում էին հոգիս կործանել. Թող հետ դառնան և ամաչեն ինձ չար կամեցողները։
16 Թող անմիջապես ամոթի մատնվեն նրանք, Ովքեր ինձ ասում էին. «Վա՜յ, վա՜յ»։
17 Թող ցնծան և ուրախանան քեզանով Բոլորը, ովքեր փնտրում են քեզ, Տե՜ր։ Թող ասեն ամեն ժամ. «Աստված մեծ է», Նրանք, ովքեր սիրում են քո տված փրկությունը։
18 Աղքատ և անտուն եմ ես, Աստվա՛ծ, Խորհի՛ր իմ մասին. Դու ես իմ օգնականն ու պաշտպանը, Եվ դու, Աստվա՛ծ իմ, մի՛ ուշացիր։