Psalms 21
1 Դպրապետին՝ լուսածագին։ Սաղմոս Դավթի
2 Աստվա՜ծ, Աստվա՜ծ իմ, նայի՛ր ինձ, Ինչո՞ւ լքեցիր ինձ. Հանցավոր խոսքերիս պատճառով Ուշացավ փրկությունն իմ։
3 Աստվա՜ծ իմ, ցերեկով քեզ աղոթեցի, Բայց ինձ չլսեցիր, Եվ գիշերվա մեջ, բայց ինձ չանսացիր։
4 Սրբերի մեջ ես ապրում դու Եվ գովերգվում Իսրայելում։
5 Քե՛զ հուսացին մեր հայրերը, Քեզ հուսացին, և փրկեցիր նրանց։
6 Դեպի քեզ իրենց ձայնը բարձրացրին և ապրեցին, Քեզ հուսացին և չամաչեցին։
7 Ես որդ եմ և ոչ թե մարդ, Մարդու կապկանք, Ժողովրդի կապկանք։
8 Բոլոր ինձ տեսնողներն արհամարհում էին ինձ՝ Շարժելով շուրթերը և օրորելով գլուխներն իրենց.
9 «Հուսաց Տիրոջը, Ուրեմն թող ազատի և փրկի նրան, Եթե նա հաճելի է Տիրոջը»։
10 Դու ես, որ հանեցիր ինձ արգանդից, Մորս ստինքներից իմ հույսը դարձար.
11 Քե՜զ հանձնվեցի ես արգանդից, Մորս որովայնից դու ես իմ Աստվածը։
12 Մի՛ հեռացիր ինձանից, Քանզի վտանգները մոտ են, Եվ չկա մեկը, որ օգնի ինձ։
13 Բազում եզներ շրջապատեցին ինձ, Եվ գեր ցուլերը, պաշարելով ինձ,
14 Ինձ վրա բացեցին բերաններն իրենց՝ Մռնչացող և հափշտակող առյուծի նման։
15 Ես հեղվեցի ջրի նման. Իմ բոլոր ոսկորները խախտվեցին, Եվ սիրտս հալած մոմ դարձավ որովայնիս մեջ։
16 Խեցու նման չորացավ իմ զորությունը, Լեզուս քիմքիս կպավ, Եվ ինձ իջեցրին մահվան հողի մեջ։
17 Շուրջս բազում շներ հավաքվեցին, Եվ չարագործների խմբերն ինձ պաշարեցին։ Ձեռքերս ու ոտքերս ծակեցին
18 Եվ հաշվեցին բոլոր ոսկորներս. Նրանք ուշիուշով նայեցին ու տեսան ինձ։
19 Իրար մեջ բաժանեցին իմ հագուստները Եվ պատմուճանիս վրա վիճակ գցեցին։
20 Դու, Տե՜ր, օգնությունդ մի՛ հեռացրու ինձանից Եվ ինձ օգնելո՛ւ շտապիր, Տե՜ր։
21 Փրկի՛ր ինձ սրից Եվ շների ձեռքերից՝ միամորիկիս։
22 Ազատի՛ր ինձ առյուծի բերանից Եվ խոնարհությունն իմ՝ ռնգեղջյուրից։
23 Պիտի հռչակեմ քո անունն իմ եղբայրներին Եվ օրհնեմ քեզ հավաքի մեջ։
24 Տիրոջ երկյուղածնե՛ր, օրհնե՛ք Տիրոջը, Եվ Հակոբի ամեն զավակ թող փառաբանի նրան։ Իսրայելի սերնդի ամեն զավակ թող երկյուղի Տիրոջից,
25 Քանզի Տերը չարհամարհեց, Չանարգեց աղքատիս աղոթքը Եվ ինձնից երես չդարձրեց, Այլ երբ աղոթեցի, ինձ լսեց։
26 Քեզանից եմ սկսում օրհներգությունս մեծ հավաքներում։ Ուխտս պիտի կատարեմ Նրա բոլոր երկյուղածների առջև։
27 Անտունները պիտի ուտեն ու հագենան, Տիրոջը փնտրողները պիտի օրհնեն նրան. Նրանց սրտերը պիտի ապրեն հավիտյանս հավիտենից։
28 Երկրի բոլոր ծագերը կհիշեն և դեպի Տերը կդառնան, Բոլոր ազգատոհմերը կերկրպագեն նրան,
29 Որովհետև Տիրոջն է արքայությունը, Եվ նա է տիրում բոլոր հեթանոսների վրա։
30 Կերան և երկրպագեցին նրան Երկրի բոլոր կշտացածները. Բոլոր հող իջնողները Նրա առջև պիտի ընկնեն։ Նրանով է հոգիս ապրում,
31 Եվ նրան պիտի ծառայի իմ զավակը։ Գալիք սերունդներին պիտի պատմեն Տիրոջ մասին,
32 Դեռ ծնվելիք ժողովրդին, որին Տերն ստեղծեց, Պիտի պատմեն արդարության մասին։