Psalms 144
1 Օրհնություն Դավթի Պիտի փառաբանեմ քեզ, Աստվա՛ծ իմ և թագավո՛ր իմ, Եվ քո անունն օրհնեմ հավիտյան և հավիտյանս հավիտենից։
2 Զօրհանապազ պիտի օրհնեմ քեզ և պիտի գովեմ քո անունը Հավիտյանս հավիտենից։
3 Մեծ է Տերը և հույժ օրհնյալ, Եվ նրա մեծությանը չափ չկա։
4 Սերնդեսերունդ պիտի գովեն քո գործերը Եվ պատմեն քո զորությունները։
5 Պիտի խոսեն քո սրբության փառքի մեծ վայելչությունից Եվ քո հրաշագործությունները պատմեն։
6 Եվ պիտի պատմեն քո ահի զորությունը Եվ քո մեծությունը։
7 Քո մեծ բարության հիշատակը պիտի ավետեն Եվ ցնծան քո արդարությամբ։
8 Գթած և ողորմած է Տերը, համբերատար և բազումողորմ։
9 Քաղցր է Տերը բոլորի հանդեպ, և նրա գթությունը Բոլոր արարածների վրա է։
10 Քո բոլոր գործերը, Տե՜ր, քեզ պիտի խոստովանեն, Եվ քո սրբերը պիտի օրհնեն քեզ։
11 Քո արքայության փառքը պիտի ասեն Եվ պատմեն քո զորության մասին։
12 Որ մարդկանց որդիները ճանաչեն քո զորությունը, Քո արքայական մեծ վայելչության փառքերը։
13 Քո արքայությունը ողջ հավիտենականության Արքայությունն է, Եվ տերությունդ՝ սերնդեսերունդ։ Տերը հավատարիմ է իր բոլոր խոստումներում Եվ արդար՝ իր բոլոր գործերում։
14 Տերը հաստատում է բոլոր սայթաքողներին, Ոտքի կանգնեցնում բոլոր գլորվածներին։
15 Բոլոր աչքերը քեզ են վստահում, Եվ դու ես ժամանակին կերակուր տալիս նրանց. Տալիս ես նրանց, և նրանք սնվում են։
16 Բացում ես ձեռքդ և հագեցնում բոլորին Քո կամքի քաղցրությամբ։
17 Արդար է Տերն իր բոլոր ճանապարհներին Եվ սուրբ՝ իր բոլոր գործերում։
18 Տերը մոտ է բոլոր նրանց, ովքեր աղոթում են իրեն, Բոլոր նրանց, ովքեր ճշմարտությամբ են աղոթում։
19 Տերը կատարում է իրենից երկյուղածների կամքը, Լսում է նրանց աղոթքները և փրկում նրանց։
20 Տերը պահում է բոլոր նրանց, ովքեր սիրում են իրեն, Բոլոր մեղավորներին կործանում է Տերը։
21 Բերանս Տիրոջ օրհնությունները պիտի խոսի. Ամեն շնչավոր պիտի օրհնի նրա սուրբ անունը Հավիտյան և հավիտյանս հավիտենից։