Job 8
1 Բաղդատ Սավքեցին պատասխանեց ու ասաց.
2 «Մինչև ե՞րբ ես այդպես խոսելու։ Շաղակրատության շունչ կա քո բերանում։
3 Տերը մի՞թե անիրավ է դատում, կամ նա, որ ամեն ինչ ստեղծեց, իրավունքը կաղավաղի՞։
4 Եթե քո զավակները մեղանչեցին նրա առաջ, Նա էլ պատժեց նրանց անօրենությունների համար։
5 Բայց դու աղոթքներով վաղ առավոտյան դիմի՛ր Ամենակալ Տիրոջը.
6 եթե սուրբ ու ճշմարիտ լինես, քո աղոթքներին ականջ կդնի, կվերականգնի արդարության քո հարկը։
7 Քո առաջինները քիչ կլինեն, քո վերջինները՝ անբավ։
8 Հարցրո՛ւ նախկին սերունդներին քննի՛ր քո նախնիների փորձը։
9 Մենք երեկվան ենք պատկանում և բան չենք իմանում. մեր կյանքը ստվեր է երկրի վրա։
10 Մի՞թե նրանք քեզ չեն ուսուցանի ու պատմի, իրենց սրտից չե՞ն բխեցնի իրենց խոսքերը։
11 Մի՞թե պապիրուսը կկանաչի առանց ջրի, կամ եղեգը առանց ջրվելու կբարձրանա՞։
12 Չի՞ հնձվելու այն, մինչ իր արմատների վրա է. եթե ամեն խոտ մինչև հագեցում չոռոգվի, չի՞ չորանա։
13 Արդ, բոլորի վախճանն այնպիսին կլինի, որ կմոռանան Տիրոջը, որովհետև ամբարիշտի հույսը կկորչի։
14 Շեն չի լինի նրա տունը. սարդոստայնի պես կանհետանա նրա հարկը։
15 Թեկուզ և հաստատի իր տունը, այն կանգուն չի մնա. այն մի հպումից իսկ չի դիմանա։
16 Արեգակից հեռու տեղում է խոնավությունը, և նրա նեխվածքից է դուրս գալու իր շիվը։
17 Քարակարկառի վրա է ննջելու ու մանրախիճ քարերի վրա ապրելու.
18 իսկ եթե արմատախիլ արվի իր տեղից, նրա տեղն էլ ուրանալու է նրան։ Այսպիսի բան չե՞ս տեսել միթե.
19 ամբարիշտի կործանումն այսպիսին է լինելու, իսկ հողից ուրիշն է բուսնելու։
20 Տերը չի մերժում անմեղին. ամբարիշտի ամեն ընծա ընդունելի չի լինելու։
21 Ճշմարիտ մարդկանց բերանները ծիծաղով են լցվելու, նրանց շրթունքները՝ գոհությամբ։
22 Նրանց թշնամիներն ամոթ են հագնելու. ամբարիշտի բնակարաններն այլևս չեն մնալու»։