Job 36
1 Եղիուսը նորից խոսեց ու ասաց.
2 «Ինձ դեռ մի փոքր բան է մնում, որ քեզ սովորեցնեմ այն, ինչ դու չգիտես, քանի որ մեջս դեռ ունեմ խոսքեր,
3 որ միտքս ընկալել է հեռու հեռվից։ Արդարությամբ ասելու եմ
4 ճշմարիտ բաներ և ոչ թե լսված անիրական ու դատարկ խոսքեր։
5 Իմացի՛ր, որ Տերը չի մերժում անմեղին. հզոր է իր զորությամբ.
6 ամբարիշտի կյանքը չի խնայելու և պաշտպանելու է աղքատի իրավունքը։
7 Իր աչքը չի կտրի արդարից, և ով որ իր առաջ լինի, թագավորների հետ գահին է բազմելու. նրանց հաղթական է դարձնելու և բարձրացնելու։
8 Իսկ չարերը, ձեռնակապերով կաշկանդված, թշվառության պարաններով են կապկպվելու։
9 Նրանց հայտնելու է իրենց արարքները, նաև հանցանքները, որ սաստկացել են։
10 Լսելու է արդարին, ու ասելու է, որ հետ կանգնեն անիրավությունից։
11 Եթե լսեն ու իրեն ծառայեն, իրենց օրերը բարիքների մեջ են ավարտելու, տարիները՝ շքեղության մեջ։
12 Բայց ամբարիշտներին չի ապրեցնելու, որովհետև նրանք չուզեցին Տիրոջը ճանաչել, որովհետև խրատվել էին, բայց չէին հնազանդվել։
13 Սրտով կեղծավորներն իրենց հանդեպ զայրույթ են գրգռելու, ճիչ ու աղաղակ չեն բարձրացնելու, որովհետև Տերը կապել է նրանց։
14 Նրանք երիտասարդ տարիքում են մեռնելու, նրանց կյանքը խոցոտվելու է հրեշտակների կողմից
15 այն բանի համար, որ խեղճին ու անզորին են նեղել։ Տերը բարձրացնելու է հեզերի իրավունքները.
16 քեզ էլ փրկեց թշնամու երախից։ Իր տակ գտնվող անդունդներից ազատեց քեզ ու առաջդ ճոխությամբ լի սեղան դրեց։
17 Չի պակասելու արդարների ուղիղ դատաստանը,
18 բայց զայրույթ է իջնելու ամբարիշտների վրա անօրեն կաշառքի համար, որ ընդունում էին անիրավությամբ։
19 Թող քո միտքը կամովին երես չդարձնի խնդրանքներից, երբ տկարները ցավի մեջ են։ Զորությամբ բոլոր օժտվածներին
20 առաջ չտանես գիշերը, որպեսզի ժողովուրդը նրանց փոխարեն դուրս չգա։
21 Այլ զգո՛ւյշ եղիր, գուցե անպատեհ բաներ անես, որովհետև նրան փրկել ես աղքատությունից։
22 Ահա Ամենազորը կզորացնի իր զորությամբ, որովհետև այն ո՞վ է, որ նրա պես ուժեղ է,
23 կամ այն ո՞վ է, որ քննում է նրա գործերը, կամ այն ո՞վ է, որ կասի. «Ինչ որ արել է, անիրավությամբ է արել»։
24 Հիշի՛ր, շա՜տ մեծ են նրա գործերը, որ հանձնված են արդար մարդկանց։
25 Ամեն մարդ անձամբ է տեսել, թե մարդիկ որքա՛ն են խոցոտված։
26 Ահա, Ամենազորը շատ մեծ է, բայց մենք չենք իմանա. նրա տարիների թիվն անսպառ է։
27 Նա հաշվել է անձրևի շիթերը, և սրանք անձրևի տեսքով կլցվեն ամպերի մեջ։
28 Երկինքը կհորդա. ամպերին հովանի դարձրեց անթիվ մարդկանց վրա, մեգ են դարձել մարդկանց վրա։ Ժամանակ է սահմանել անասունների համար, և դրանք գիտեն ծնելու կարգը։ Այս բոլորի վրա զարմացած չէ՞ քո միտքը, սիրտդ չի՞ դողում կրծքիդ տակ, քանի որ նա կատարել է մեծ-մեծ բաներ, որ մենք չգիտեինք։ Ձյանը հրամայում է. «Իջի՛ր լեռան վրա», նաև ձմեռային անձրևներին, որ ցույց տան իրենց զորությունը։ Ամեն մարդու միջոցով է վկայում այս բոլորը, որպեսզի յուրաքանչյուր ոք իմանա իր թույլ լինելը։
29 Իսկ դու կիմանա՞ս ամպերի սփռվելը կամ նրա վրանի չափերը։
30 Ահա իր լույսը գցում է նրա վրա և ծովի խորքերն է ծածկել,
31 որպեսզի դրանցով դատի ժողովուրդներին, կերակուր պարգևի զորացածին։
32 Ձեռքերով լույսն է ծածկել ու հրահանգ տվել, թե դա ե՛րբ պետք է լինի։
33 Իր բարեկամներին կպատմի դրա, ինչպես նաև ինչքերի ու անիրավության մասին»։