Job 24
1 «Ամբարտավաններն ինչո՞ւ մոռացան Տիրոջը.
2 ամբարիշտները սահմանն անցան։ Հոտը հովվի հետ հափշտակեցին,
3 որբուկի էշը քշեցին տարան ու այրու եզն անգամ վերցրին։
4 Խեղճին շեղեցին ուղիղ շավիղից. երկրի հեզերին, բոլորին մեկտեղ թաքցրեցին նրանք,
5 ու սրանք դարձան ինչպես վայրի էշ՝ դաշտերում։ Վատնեցին իրենց գործերն ինձ համար. քաղցր եղավ նրանց հացը լկտիների հետ։
6 Չհասած արտը, որ իրենցը չէր, հնձեցին նրանք. խեղճերը մշակեցին ամբարիշտների այգին, բայց հաց ու վարձ չստացան։
7 Նրանք բազում մերկերի քնեցրին առանց հագուստի, զգեստը հանեցին նրանց վրայից։
8 Նրանք թրջվում են լեռների ցողից. քանի որ բնակվելու տեղ չունեն. ժայռերի տակ են ապաստան գտնում։
9 Հափշտակեցին ստինքից որբին և թշվառին տառապեցրին։
10 Իզուր քնեցրին մերկին անհագուստ, սովահարների հացը կտրեցին։
11 Դարան սարքեցին կիրճերում իզուր. ճանապարհն ուղիղ՝ չիմացան երբեք։
12 Մարդիկ զրկվեցին քաղաքից, տնից. հոգիները մանուկների խիստ հեծեծեցին, և նա ինչո՞ւ չի այցելում սրանց։
13 Երկրում ապրեցին, սակայն չիմացան. արդարության ճանապարհը չճանաչեցին. նրա շավիղով երբեք չընթացան։
14 Տեղեկանալով նրանց գործերին՝ խավարի մատնեց նրանց, ու կնմանվեն գիշերվա գողի։
15 Շնացողն աչքը խավարին է սևեռում։ Եվ կասի՝ «Թող ոչ մեկի աչքը չտեսնի ինձ. քող է գցել իր երեսին»։
16 Մութի մեջ է փորել իր տունը. ցերեկը փակել են իրենց ու չեն իմացել՝ ի՛նչ է լույսը։
17 Առավոտը նրանց բոլորի համար մահվան ստվեր է, և ըմբռնում են տագնապը մահվան ստվերի։
18 Աննշան է ջրերի երեսին, թող կործանվի նրանց ունեցվածքը երկրի վրա.
19 և նրանց տունկերը լինեն ցամաքած հողի վրա. որբից խլեցին խուրձը ցորենի.
20 նրանց մեղքերը երեսով տվեցին, ցողի մշուշի նման անհայտ էլ կմնա։ Եվ թող նրան հատուցվի իր արածի համեմատ. անիրավ ամեն մարդ թող ջարդվի քայքայված ծառի պես,
21 քանի որ ամուլ կնոջը բարի բան չի արել, որբևայրուն չի ողորմել,
22 տկարին կործանել է բարկությամբ։ Ու անգամ թե ոտքի կանգնի՝ վստահ չի լինի իր կյանքի հանդեպ։
23 Հիվանդանալիս չի ակնկալի, որ կառողջանա, այլ կընկնի նա հիվանդությունից.
24 իր հոխորտանքով շատերին է տառապեցրել։ Կթառամի տոթ եղանակին, ինչպես խոտը կամ ինչպես հասկը՝ ընկած ցողունից։
25 Թե լինի մեկը, որ ասի, թե ստեր եմ խոսում, թող բանի տեղ չդնի իմ ասածները»։