Job 18
1 Բաղդատ Սավքեցին նորից խոսեց ու ասաց.
2 «Մինչև ե՞րբ դադար չես առնելու. հանդարտվի՛ր, որ մենք էլ խոսենք։
3 Ինչո՞ւ ենք մենք չորքոտանիների պես լռել քո առաջ,
4 իսկ դու բարկությամբ ես շիկացել։ Հիմա եթե դու մեռնես, երկնքի ներքո ամայությո՞ւն է տիրելու, թե՞ լեռներն են հիմնահատակ կործանվելու։
5 Ամբարիշտների լույսը հանգչելու է. նրանց բոցը վեր չի բարձրանա։
6 Նրա լույսը խավարելու է իր հարկի տակ, և ճրագը հանգչելու է նրա վրա։
7 Հետին մարդիկ հափշտակելու են նրա ունեցվածքը. սխալ են դուրս եկել նրա խորհուրդները։
8 Ոտքը ծուղակն է ընկնելու, և նա թպրտալու է ուռկանում։
9 Դարաններ են վրան թափվելու. ծարավիներին զորացնելու է նրա դեմ։
10 Նրա համար հողում թակարդ է թաքցված, իսկ ճանապարհին՝ որոգայթներ։
11 Ցավերը բոլոր կողմերից ոչնչացնելու են նրան. շատերը նրա ոտքերին են փարվելու սովի նեղության ժամանակ։
12 Նրա համար ահավոր կործանում է պատրաստված.
13 ոտքի ներբանները մաշվելու են։ Տարաժամ մահը ուտելու է նրա գեղեցկությունը.
14 առողջությունը դուրս է քշվելու նրա հարկից։ Տագնապով նրան է հասնելու արքունի պատուհասը։
15 Գիշերը նա բնակվելու է նրա հարկի տակ. նրա վայելչությունը ծծումբի բոցով է փչանալու։
16 Ներքևում նրա արմատները չորանալու են, վերևում հունձն է փչանալու։
17 Նրա հիշատակը կորչելու է երկրի երեսից, նրա անունը չի հիշվելու հրապարակներում։
18 Լույսից խավար են քշելու նրան,
19 և իր ժողովրդի մեջ ծանոթ չի ունենալու։ Երկնքի ներքո նրա տունը չի փրկվելու, այլ այնտեղ օտարներ են բնակություն հաստատելու։
20 Նրա վրա հեծեծելու են հետին մարդիկ միայն, առաջինները զարմանքով են համակվելու,
21 թե սրա՞նք են անիրավների տները, սրա՞նք են այն մարդկանց տեղերը, ովքեր Տիրոջը չճանաչեցին»։