1Յիշեցո՛ւրբոլորին, որհնազանդին ու հպատակին պետական իշխանութիւններուն, եւ պատրաստ ըլլան՝ ամէն տեսակի բարի ծառայութիւն մատուցանելու։
2Թելադրէ՝ ոեւէ մէկը չանարգել, մարդու հետ չկռուիլ, այլ՝ փափկանկատ ըլլալ եւ կատարեալ ազնուութիւն ցուցաբերել բոլոր մարդոց հանդէպ։
3Որովհետեւ ժամանակին մենք ալ անմիտ էինք, Աստուծոյ անհնազանդ, եւ մոլորած։ Պէս–պէս ցանկութեանց եւ անառակ հաճոյքներու գերին դարձած՝ կ՚ապրէինք չարութեամբ ու նախանձով, ատելի էինք ուրիշներուն եւ կ՚ատէինք իրար։
4Բայց ապա Աստուած, մեր Փրկիչը, իր քաղցրութիւնն ու մարդասիրութիւնը յայտնեց
5եւ մեզ փրկեց, ո՛չ թէ մեր կատարած արդար գործերուն համար, այլ՝ պարզապէս ողորմած ըլլալուն համար։ Մեզի նոր ծնունդ տուաւ մկրտութեամբ եւ Սուրբ Հոգիին միջոցաւ մեզ վերանորոգեց։
6Աստուած Սուրբ Հոգին առատօրէն մեր վրայ թափեց՝ մեր փրկչին Յիսուս Քրիստոսի միջոցաւ,
7որպէսզի Քրիստոսի շնորհքովը արդարացած՝ ժառանգենք յաւիտենական կեանքը, որուն կը յուսանք։
8Ստոյգ է ինչ որ կ՚ըսեմ. եւ կ՚ուզեմ որ դուն այս կէտերուն վրայ դնես շեշտը, որպէսզի Աստուծոյ հաւատացողները բարի գործերու հետամուտ ըլլան, որովհետեւ ա՛յդ է բարին եւ մարդոց օգտակարը։
9Միւս կողմէ, խուսափէ՛ յիմար վէճերէն, ազգաբանական ցանկերով զբաղելէ, Մովսիսական Օրէնքին շուրջ ստեղծուած բանավէճերէն ու բանակռիւներէն, որովհետեւ անօգուտ են եւ անիմաստ։
10Ճշմարտութենէն հեռացած ոեւէ անձ մէկ կամ երկու անգամ խրատելէ ետք՝ երբ տեսնես որ անօգուտ է՝ կապերդ խզէ՛ անոր հետ,
11գիտնալով որ անիկա մոլորած մըն է եւ մեղքի մէջ կը մնայ՝ ինքզինքին դատապարտութեան պատճառ դառնալով։
12Երբ որ Արտեմասը կամ Տիքիկոսը քեզի ղրկեմ, աճապարէ եւ քովս եկուր։ Ես Նիկոպոլիս կը գտնուիմ, եւ մտադրեցի ձմեռը հոս անցընել։
13Գալէդ առաջ ջանա՛ ինծի ղրկել Զենասը՝ օրէնսգէտը, եւ Ապոլլոնը. եւ նայէ որ բանի մը պակասը չունենան։
14Մերիններն ալ թող սորվին բարի գործերու հետամուտ ըլլալ, որպէսզի անհրաժեշտ կարիքներուն հասնին եւ օգտակար դառնան։
15Հետս եղողները բոլորն ալ բարեւներ ունին քեզի։ Դուն ալ մեր բարեւները փոխանցէ անոնց՝ որոնք մեզ կը սիրեն իբրեւ հաւատակից եղբայրներ։ Աստուծոյ շնորհքը ձեր բոլորին հետ ըլլայ։