Titus 2
1 Սակայն դուն պատուիրէ այն՝ ինչ որ հաւատքի առողջ ուսումը կը պահանջէ։
2 Ծերերուն պատուիրէ որ զգաստ ըլլան, պարկեշտ ու զուսպ, եւ օրինակ ըլլան թէ՛ հաւատքի, թէ՛ սիրոյ, թէ՛ համբերութեան եւ թէ՛ ժուժկալութեան։
3 Նոյնպէս, պառաւներուն պատուիրէ որ զգաստ եւ մաքրակենցաղ ըլլան. չըլլան բանսարկու, ո՛չ ալ գինեմոլ, այլ՝ բարեխրատ։
4 Թող սեփական օրինակով մանկահասակ կիներուն սորվեցնեն՝ իրենց ամուսիններն ու զաւակները սիրել,
5 ըլլալ համեստ, անբիծ, տնաշէն, բարի, եւ իրենց ամուսիններուն հնազանդ, որպէսզի պատճառ չըլլան որ Աստուծոյ խօսքը անարգուի։
6 Նոյնպէս յորդորէ երիտասարդները որ զուսպ ըլլան ամէն կերպով։
7 Քու անձովդ բարի գործերու օրինակ եղիր բոլորին, իսկ ուսուցումներովդ օրինակը տուր անկեղծութեան, մաքրութեան եւ պարկեշտութեան։
8 Միշտ ողջմտութեամբ խօսէ, պարսաւանքի տեղի չտալու համար, որպէսզի ոեւէ հակառակորդ ամօթով մնայ եւ մեր մասին չարախօսելիք բան չունենայ։
9 Ծառաներուն պատուիրէ որ իրենց տէրերուն հնազանդ ըլլան եւ ամէն ինչով գոհ ձգեն։ Ո՛չ առարկեն,
10 ո՛չ գողնան. այլ՝ ճշմարիտ ու կատարեալ հաւատարմութիւն ցուցաբերեն, որպէսզի ամէն ինչով պատիւ բերեն մեր փրկչին՝ Աստուծոյ Աւետարանին ։
11 Որովհետեւ Աստուած իր շնորհքը յայտնեց՝ որպէսզի բոլոր մարդիկ փրկուին։
12 Այդ շնորհքը մեզ կը մղէ որ անհաւատ կենցաղէ եւ աշխարհիկ ցանկութիւններէ հեռանանք, զգաստութեամբ, արդարութեամբ ու բարեպաշտութեամբ ապրինք այս աշխարհի մէջ,
13 եւ յոյսով սպասենք այն երջանիկ օրուան, երբ մեր մեծ Աստուածն ու փրկիչը՝ Յիսուս Քրիստոս իր փառքով պիտի յայտնուի ։
14 Որովհետեւ Քրիստոս իր անձը տուաւ մեզի համար, որպէսզի մեզ ազատէ մեր բոլոր անօրէնութիւններէն, եւ մեզ մաքրելով՝ իր սեփական ժողովուրդը դարձնէ, բարի գործերու նախանձախնդիր։
15 Այս բաները սորվեցուր հաւատացեալներուդ։ Քաջալերէ՛ զանոնք եւ ի հարկին յանդիմանէ՝ հեղինակութիւնդ գործածելով, այնպէս՝ որ ոեւէ մէկը քեզ չարհամարհէ։