Bible

1 Մենք, հաւատքով զօրաւոր եղողներս, պէտք է համբերութեամբ տանինք տկարներու տկարութիւնները, եւ միայն մենք մեր մասին չմտածենք։ 2 Մեզմէ իւրաքանչիւրը իր շուրջ եղողներով պէտք է հետաքրքրուի՝ անոնց բարիքը խորհելով, անոնց հաւատքըամրապնդելու համար։ 3 Արդարեւ, Քրիստոս ալ ինքզինքը չմտածեց, այլ՝ ինչպէս Սուրբ գիրքը կ՚ըսէ, «Քեզ նախատողներուն նախատինքները իմ վրաս ինկան»։ 4 Բայց ինչ որ սկիզբէն Սուրբ գիրքին մէջ գրուեցաւ՝ մեր դաստիարակութեան համար գրուեցաւ, որպէսզի համբերութեամբ եւ Սուրբ գիրքերուն մեզի պարգեւած քաջալերանքով՝ յոյս ունենանք։ 5 Թող համբերութիւն եւ ամէն տեսակի քաջալերանք պարգեւողը, Աստուած, շնորհէ՝ որ նոյնը խորհիք իրարու մասին, Յիսուս Քրիստոսի օրինակով, 6 որպէսզի միասիրտ եւ միաբերան փառաւորէք զԱստուած, մեր Տիրոջ Յիսուս Քրիստոսի Հայրը։ 7 Հետեւաբար ընդունեցէ՛ք իրար, ինչպէս որ Քրիստոս ալ ձեզ ընդունեց Աստուծոյ փառքին համար։ 8 Կ՚ըսեմ ձեզի, թէ Քրիստոս Հրեաներուն ծառայեց՝ որպէսզի Աստուծոյ հաւատարմութիւնը ցոյց տայ եւ նախահայրերուն եղած խոստումները հաստատէ, 9 եւ որպէսզի բոլոր ազգերը զԱստուած փառաւորեն՝ իր ողորմութեանը համար. ինչպէս Սուրբ գիրքին մէջ գրուած է.– «Ատոր համար ալ բոլոր ազգերուն մէջ պիտի փառաւորեմ քեզ, եւ սաղմոսներով քու անունդ օրհներգեմ»։ 10 Ուրիշ տեղ մը կ՚ըսէ.– «Ուրախացէ՛ք, ո՜վ ազգեր, անոր ժողովուրդին հետ միասին»։ 11 Դարձեալ ուրիշ տեղ մը կ՚ըսէ.– «Օրհնեցէ՛ք Տէրը, դուք՝ ազգե՛ր բոլոր. գովեցէք զայն, դուք՝ ժողովուրդնե՛ր բոլոր»։ 12 Իսկ Եսայի կ՚ըսէ.– «Յեսսէի արմատը պիտի ծլի եւ պիտիելլէ՝ իշխելու համար ազգերուն, եւ ազգերը իրենց յոյսը անոր պիտի կապեն»։ 13 Արդ, յոյսի պարգեւիչ Աստուածը թող ձեզ ամբողջական ուրախութեամբ եւ խաղաղութեամբ լեցնէ՝ իրեն հանդէպ ունեցած ձեր հաւատքովը, որպէսզի Սուրբ Հոգիին զօրութեամբ յոյսով առատանաք։ 14 Ինչ կը վերաբերի ձեզի, եղբայրնե՛ր, ես ինքս համոզուած եմ որ դուք ինքնին բարութեամբ լեցուն էք եւ ամբողջական գիտութեամբ լեցուած, եւ հետեւաբար կրնաք նաեւ իրար խրատել։ 15 Բայց նամակիս մէջ որոշ տեղեր շատ խիստ եղայ ձեզի հանդէպ՝ կարգ մը բաներ վերյիշեցնելու համար ձեզի։ Աստուած ինծի իր շնորհքը տուաւ, 16 որպէսզի Քրիստոս Յիսուսի սպասաւորը ըլլամ հեթանոսներուն համար եւ Աստուծոյ Աւետարանին մատակարարման նուիրուիմ, որպէսզի հեթանոսները Աստուծոյ ընծայուին իբրեւ Սուրբ Հոգիով սրբուած ընդունելի պատարագ ։ 17 Թէպէտ իրաւունք ունիմ պարծենալու Քրիստոս Յիսուսով այն վաստակին համար որ ունիմ Աստուծոյ քով, 18 բայց պիտի չհամարձակիմ ուրիշ բան յիշել, եթէ ոչ միայն այն՝ ինչ որ Քրիստոս իմ միջոցաւս կատարեց՝ հեթանոսները Աստուծոյ հնազանդեցնելու համար, խօսքով թէ գործով, 19 զօրաւոր նշաններով ու հրաշքներով, Սուրբ Հոգիին զօրութեամբ։ Այնպէս որ Երուսաղէմէն սկսեալ մինչեւ Իլլիրիկում՝ ամէն կողմ Քրիստոսի Աւետարանը տարածեցի։ 20 Եւ ինծի պատիւ սեպեցի աւետարանել միայն հոն՝ ուր Քրիստոսի անունը չէր լսուած, որպէսզի ուրիշին դրած հիմին վրայ շինած չըլլամ, այլ, ինչպէս Սուրբ գիրքը կ՚ըսէ.– 21 «Անոնք՝ որոնց չէր պատմուած իր մասին՝ պիտի տեսնեն, անոնք որոնք չէին լսած իր մասին՝ պիտի իմանան»։ 22 Այս մտահոգութիւնն էր որ բազմաթիւ անգամներ ինծի արգելք եղաւ ձեզի գալու։ 23 Բայց հիմա որ այս կողմերը ա՛լ ընելիք մը չունիմ, եւ երկար տարիներէ ի վեր անձկութեամբ կը փափաքիմ ձեզի գալ, կ՚ուզեմ առիթէն օգտուիլ։ 24 Եթէ Սպանիա անցնելու ըլլամ՝ յոյս ունիմ որ ճամբուս վրայ կը տեսնեմ ձեզ, եւ ձեր օգնութեամբ ալ կ՚անցնիմ հոն, անշուշտ նախ քիչ մը ձեր ներկայութիւնը վայելելէ ետք։ 25 Բայց հիմա Երուսաղէմ կ՚երթամ՝ օգնութիւն տանելու համար այնտեղի հաւատացեալներուն։ 26 Որովհետեւ Մակեդոնիայի եւ Աքայիայի եղբայրները յօժարակամ ուզեցին իրենց նուէրներով մասնակից դառնալ Երուսաղէմի աղքատ հաւատացեալներու կարիքներուն։ 27 Այդպէս ուզեցին, որովհետեւ նաեւ պարտական կը զգան անոնց հանդէպ։ Եւ արդարեւ, քանի որ հեթանոսներ հաղորդակից եղան անոնց հոգեւոր բարիքներուն, իրենք ալ պարտին մասնակից դառնալ անոնց նիւթական կարիքներուն։ 28 Արդ, այս պարտականութիւնս կատարելէ եւ յիշեալ նուէրները Երուսաղէմի եկեղեցիին յանձնելէ ետք՝ ձեր վրայով Սպանիա պիտի անցնիմ։ 29 Եւ գիտեմ, որ երբ ձեզի գամ՝ Քրիստոսի Աւետարանին ամբողջական օրհնութեամբը պիտի գամ։ 30 Եղբայրնե՛ր, մեր Տիրոջմով՝ Յիսուս Քրիստոսով եւ Սուրբ Հոգիին պարգեւած սիրովը կ՚աղաչեմ, որ ինծի համար Աստուծոյ աղօթելով պատերազմակից ըլլաք ինծի, 31 որպէսզի Աստուած զիս ազատէ իր կամքին անհնազանդ մարդոց ձեռքէն, որոնք Հրէաստան կը գտնուին, եւ Երուսաղէմ տանելիք օգնութիւնս ընդունելի ըլլայ այնտեղի հաւատացեալներուն։ 32 Որպէսզի նաեւ Աստուծոյ կամքով ուրախութեամբ ձեզի գամ՝ ձեր քով քիչ մը հանգչելու համար։ 33 Խաղաղութեան պարգեւիչը՝ Աստուած ձեր բոլորին հետ ըլլայ։ Ամէն։