Revelation 9
1 Հինգերորդ հրեշտակն ալ փողը հնչեցուց։ Եւ տեսայ մեծ աստղ մը, որ երկինքէն ինկաւ երկիր, եւ այդ աստղին տրուեցաւ անդունդի գուբին բանալին։
2 Աստղը բացաւ անդունդի գուբը եւ ահա ծուխ ելաւ հոնկէ, նման մեծ հնոցի մը ծուխին։ Օդը լեցուեցաւ այդ ծուխով եւ արեւը խաւարեցաւ։
3 Ծուխին մէջէն մարախներ ելան երկրի վրայ, որոնց իշխանութիւն տրուեցաւ խայթելու, այնպէս՝ ինչպէս կարիճները կը խայթեն,
4 եւ անոնց ըսուեցաւ որ վնաս չհասցնեն ո՛չ երկրի խոտերուն, ո՛չ դալար տունկերուն եւ ո՛չ ալ ծառերուն, բայց միայն այն մարդոց՝ որոնք իրենց ճակատին վրայ Աստուծոյ կնիքը չունին։
5 Մարախներուն հրամայուեցաւ որ չսպաննեն այդ մարդիկը, այլ՝ հինգ ամիս չարչարեն զանոնք։ Այդ չարչարանքին պատճառած ցաւը կը նմանէր այն ցաւին, որ մէկը կ՚ունենայ երբ կարիճէն խայթուի։
6 Այն օրերուն մարդիկ մահը պիտի փնտռեն, բայց պիտի չգտնեն. պիտի ուզեն մեռնիլ, բայց մահը իրենցմէ պիտի փախչի։
7 Մարախները կը նմանէին պատերազմի պատրաստուած ձիերու. անոնց գլխուն պսակներ կային, ոսկիէ պսակի նման, եւ անոնց դէմքը մարդու դէմքի կը նմանէր։
8 Անոնց մազը կնոջ մազերու կը նմանէր եւ ակռաները՝ առիւծի ակռաներու։
9 Ունէին զրահներ, որոնք կարծես երկաթէ էին. անոնց թեւերուն ձայնը նման էր բազմաթիւ ձիերու եւ կառքերու ձայնին, երբ պատերազմի կ՚արշաւեն։
10 Անոնց պոչերը կը նմանէին կարիճի պոչերուն, որոնց ծայրը խայթոց կայ եւ որոնց միջոցաւ իշխանութիւն ունէին մարդիկը հինգ ամիս պատուհասելու։
11 Անոնք իրենց վրայ թագաւոր ունէին՝ անդունդի հրեշտակը, որուն անունը Եբրայերէն Աբադդոն էր, որ Հայերէնով կը նշանակէ՝ Կորուսիչ։
12 Առաջին աղէտը ահա անցաւ. ասոր կը յաջորդեն միւս երկու աղէտները։
13 Յետոյ վեցերորդ հրեշտակը փողը հնչեցուց. եւ լսեցի ձայն մը՝ որ կու գար Աստուծոյ դիմաց գտնուող ոսկիէ զոհասեղանին չորս անկիւններէն։
14 Ձայնը փող ունեցող վեցերորդ հրեշտակին կ՚ըսէր. «Արձակէ՛ Եփրատ մեծ գետին վրայ կապուած չորս հրեշտակները»։
15 Եւ արձակուեցան չորս հրեշտակները, որոնք ճիշդ այս ժամուն, օրուան, ամսուան եւ տարուան համար պատրաստ կեցած էին, որպէսզի սպաննեն մարդկութեան մէկ երրորդ մասը։
16 Եւ իմացայ որ անոնց հեծեալ զօրքերուն թիւը հարիւր հազարներով ու միլիոններով էր։
17 Տեսիլքիս մէջ տեսած ձիերն ու հեծեալները հագած էին կրակի գոյն, յակինթի գոյն եւ ծծումբի գոյն զրահներ։ Ձիերուն գլուխը առիւծի գլուխի կը նմանէր եւ իրենց բերանէն կրակ, ծուխ եւ ծծումբ կ՚ելլէր։
18 Անոնց բերանէն ելած այս կրակի, ծուխի եւ ծծումբի հարուածներէն՝ մարդկութեան մէկ երրորդ մասը մեռաւ,
19 քանի ձիերուն զօրութիւնը իրենց բերանին մէջ էր, ինչպէս նաեւ՝ իրենց պոչերուն։ Անոնց պոչերը օձերու կը նմանէին եւ ունէին գլուխներ, որոնցմով կը պատուհասէին։
20 Մարդկութեան մնացեալ մասը, որ չսպաննուեցաւ այս հարուածներէն, չապաշխարեց եւ իր կատարած գործերէն ետ չդարձաւ։ Անոնք չդադրեցան երկրպագելէ դեւերուն, ոսկիէ, արծաթէ, անագապղինձէ, քարէ եւ փայտէ կուռքերուն, որոնք ո՛չ կրնան տեսնել, ո՛չ լսել եւ ո՛չ ալ քալել։
21 Անոնք չապաշխարեցին իրենց կատարած մարդասպանութեան, կախարդութեան, պոռնկութեան եւ գողութեան համար։