Revelation 10
1 Ապա տեսայ ուրիշ զօրաւոր հրեշտակ մը, որ երկինքէն կ՚իջնէր՝ ամպի մը մէջ փաթթուած եւ գլխուն՝ ծիրանի գօտի։ Անոր երեսը արեւու կը նմանէր եւ ոտքերը՝ կրակէ սիւներու։
2 Իր ձեռքին մէջ բացուած գրքոյկ մը ունէր. ան իր աջ ոտքը դրաւ ծովուն վրայ, իսկ ձախը՝ ցամաքին վրայ
3 եւ բարձրաձայն աղաղակեց, ինչպէս առիւծը կը մռնչէ։ Երբ աղաղակեց՝ եօթը որոտումները թնդացին իրենց ձայներով,
4 եւ երբ եօթը որոտումները ձայնեցին՝ կ՚ուզէի գրի առնել։ Բայց երկինքէն լսեցի ձայն մը, որ կ՚ըսէր. –Մի՛ արձանագրեր ինչ որ եօթը որոտումները ըսին. գրի մի՛ առներ։
5 Յետոյ հրեշտակը, որ մէկ ոտքը դրած էր ծովուն վրայ եւ միւսը՝ ցամաքին, իր աջ ձեռքը երկինք բարձրացուց
6 եւ երդում ըրաւ յաւիտեանս յաւիտենից կենդանի Աստուծոյ անունով, անոր՝ որ ստեղծեց երկինքն ու երկիրը եւ ծովը եւ ինչ որ կայ անոնց մէջ, ու ըսաւ. «Այլեւս ուշացում պիտի չըլլայ։
7 Երբ եօթներորդ հրեշտակը իր փողը հնչեցնէ, այն ատեն Աստուծոյ ծրագիրը պիտի կատարուի, ինչպէս որ անոր ծառաները՝ մարգարէները աւետեցին։
8 Ապա այն ձայնը որ լսած էի երկինքէն, դարձեալ ինծի խօսեցաւ եւ ըսաւ. –Գնա՛, ա՛ռ այդ գրքոյկը, որ ծովուն եւ ցամաքին վրայ կանգնած հրեշտակը իր ձեռքին մէջ բացուած ունի։
9 Ես գացի հրեշտակին մօտ եւ իրմէ խնդրեցի որ ինծի տայ գրքոյկը։ Անիկա ըսաւ ինծի. –Ա՛ռ եւ կե՛ր ասիկա. ստամոքսիդ մէջ լեղի պիտի դառնայ, բայց բերանիդ մէջ մեղրի պէս քաղցր պիտի ըլլայ։
10 Հրեշտակին ձեռքէն առի բացուած գրքոյկը եւ կերայ։ Բերանիս մէջ մեղրի պէս քաղցրէր, բայց երբ կլլեցի՝ ստամոքսիս մէջ լեղի դարձաւ։
11 Ապա հրեշտակը ըսաւ ինծի. –Այս մարգարէութիւնը եւս պէտք է յայտնես բազմաթիւ ժողովուրդներու, ազգերու, լեզուներու եւ թագաւորներու։