Revelation 11
1 Յետոյինծիտրուեցաւ եղէգ մը, որ չափելիք գաւազանի կը նմանէր։ Հրեշտակը ըսաւ ինծի. –Ե՛լ եւ չափէ Աստուծոյ տաճարն ու զոհասեղանը եւ հաշուէ՛ հոն գտնուող երկրպագողները։
2 Իսկ գաւիթը, որ տաճարէն դուրս կը գտնուի՝ ձգէ՛, մի՛ չափեր, որովհետեւ անիկա հեթանոսներուն տրուած է, որոնք քառասուներկու ամիս ոտնակոխ պիտի ընեն Սուրբ Քաղաքը։
3 Ես պիտի պատուիրեմ երկու վկաներուս, որ քուրձ հագած՝ մարգարէանան այդ հազար երկու հարիւր եւ վաթսուն օրերու ընթացքին։
4 Ասոնք երկու ձիթենիներն ու երկու ճրագներն են, որոնք կը կանգնին երկրի Տիրոջ առջեւ։
5 Եթէ ոեւէ մէկը ուզէ անոնց վնասել, կրակ պիտի ելլէ անոնց բերանէն ու ոչնչացնէ իրենց թշնամիները. եւ այսպէս պիտի սպաննուին բոլոր անոնք՝ որոնք կ՚ուզեն վնաս հասցնել անոնց։
6 Երկու վկաները իշխանութիւն ունին երկինքը փակելու, որպէսզի իրենց մարգարէացած ժամանակամիջոցին անձրեւ չտեղայ։ Անոնք իշխանութիւն ունին նաեւ ջուրերուն վրայ՝ զանոնք արիւն դարձնելու, ինչպէս նաեւ երկիրը աղէտներով պատուհասելու՝ քանի՛ անգամ որ ուզեն։
7 Եւ երբ իրենց վկայութեան ժամանակաշրջանը աւարտի, այն ատեն անդունդէն ելլող գազանը պիտի պատերազմի իրենց դէմ, պիտի յաղթէ անոնց եւ սպաննէ զանոնք։
8 Անոնց մարմինները փռուած պիտի մնան հրապարակին վրայ այն մեծ քաղաքին՝ ուր իրենց Տէրը խաչուեցաւ եւ որ խորհրդանշական անունով Սոդոմ եւ Եգիպտոս կը կոչուի։
9 Բոլոր ցեղերէն, ժողովուրդներէն, լեզուներէն եւ ազգերէն մարդիկ՝ երեքուկէս օր անոնց դիակները պիտի տեսնեն եւ թոյլ պիտի չտան որ անոնց դիակները գերեզմաններու մէջ դրուին։
10 Երկրի վրայ ապրողները անոնց մահուան համար պիտի ուրախանան եւ ցնծան, մինչեւ իսկ նուէրներ պիտի տան իրարու, որովհետեւ այս երկու մարգարէները շատ չարչարեցին երկրի բնակիչները։
11 Երեքուկէս օր ետք՝ անոնց մէջ մտաւ կեանք տուող Հոգին, որ Աստուծմէ կու գայ, եւ երկու վկաները ելան ու ոտքի կանգնեցան։ Եւ ահ ու սարսափ ինկաւ բոլոր տեսնողներուն վրայ։
12 Յետոյ երկու մարգարէները երկինքէն ուժգին ձայն մը լսեցին, որ իրենց կ՚ըսէր. «Ելէ՛ք, հո՛ս եկէք»։ Անոնք ամպերու մէջ երկինք բարձրացան, մինչ իրենց թշնամիները կը դիտէին զիրենք։
13 Նոյն պահուն զօրաւոր երկրաշարժ մը տեղի ունեցաւ եւ քաղաքին մէկ տասներորդ մասը կործանեցաւ. այս երկրաշարժէն մահացան եօթը հազար հոգի։ Մեծ սարսափ մը պատեց մնացեալները, որոնք երկնաւոր Աստուծոյ փառք կու տային։
14 Երկրորդ աղէտն ալ ահա անցաւ։ Երրորդը շուտով կու գայ։
15 Երբ եօթներորդ հրեշտակը փողը հնչեցուց, երկինքի մէջ ուժգին ձայներ լսուեցան, որոնք կ՚ըսէին. «Այլեւս ամբողջ աշխարհի թագաւորութիւնը կը պատկանի մեր Տիրոջ եւ իր Օծեալին, որ պիտի թագաւորէ յաւիտեանս յաւիտենից»։
16 Քսանչորս երէցները, որոնք իրենց գահերուն վրայ նստած էին Աստուծոյ դիմաց, իրենց երեսին վրայ գետին իյնալով՝ երկրպագեցին Աստուծոյ
17 եւ ըսին.– «Ամենակա՛լ Տէր Աստուած, դուն որ Է–ն ես եւ միշտ էիր. շնորհակալութի՜ւն քեզի, որ մեծ զօրութիւնդ առիր եւ թագաւորեցիր։
18 Ազգերը զայրացան, սակայն հասաւ բարկութիւնդ եւ մեռելները դատելու ժամանակը. հասաւ ժամանակը՝ վարձատրելու ծառաներդ՝ մարգարէները եւ քու ընտրեալներդ, եւ անոնք՝ որոնք կ՚ակնածին քեզմէ, մեծ ու փոքր։ Հասաւ ժամանակը կորուստի մատնելու անոնք՝ որոնք երկիրը կ՚ապականեն»։
19 Եւ ահա երկինքի մէջ Աստուծոյ տաճարը բացուեցաւ ու հոն երեւցաւ Աստուծոյ Ուխտին Տապանակը։ Եղան փայլատակումներ, ձայներ, որոտումներ, երկրաշարժ եւ սաստիկ կարկուտ։