Revelation 12
1 Եւ ապա մեծ նշան մը երեւցաւ երկինքի մէջ։ Տեսնուեցաւ կին մը, որ արեւը հագած էր, լուսինը առած իր ոտքերուն տակ, եւ գլխուն ունէր տասներկու աստղերով պսակ մը։
2 Անիկա յղի էր եւ երկունքի ճիչեր կ՚արձակէր ու ծնանելու մօտ ըլլալուն՝ սաստիկ ցաւեր կը քաշէր։
3 Ուրիշ նշան մըն ալ երեւցաւ երկինքի մէջ։ Տեսնուեցաւ հրեղէն մեծ վիշապ մը, որ եօթը գլուխ եւ տասը եղջիւր ունէր եւ թագ մը՝ իւրաքանչիւր գլխուն վրայ։
4 Իր պոչով կը քաշէր կը տանէր երկինքի աստղերուն մէկ երրորդ մասը, որ նետեց երկրի վրայ։ Անիկա ծնանելու մօտ եղող կնոջ դիմաց կանգնեցաւ, որպէսզի երբ կինը զաւակը ծնի՝ կլլէ զայն։
5 Կինը արու զաւակ մը ծնաւ, որ սահմանուած էր հովուելու բոլոր ազգերը՝ երկաթէ մականով։ Բայց կնոջ զաւակը յափշտակուելով տարուեցաւ Աստուծոյ եւ անոր գահին մօտ։
6 Կինը անապատ փախաւ, ուր իրեն համար տեղ պատրաստուած էր Աստուծոյ կողմէ, որպէսզի հոն կերակրուի հազար երկու հարիւր վաթսուն օրեր։
7 Եւ պատերազմ տեղի ունեցաւ երկինքի մէջ։ Միքայէլ եւ իր հրեշտակները կռուեցան վիշապին դէմ, որ իր կարգին իր հրեշտակներով կը պատերազմէր։
8 Բայց վիշապը եւ իր հրեշտակները պարտուեցան։ Այլեւս իրենց համար տեղ չմնաց երկինքի մէջ։
9 Մեծ վիշապը, այն առաջին օձը, որ Բանսարկու եւ Սատանայ կը կոչուի եւ որ ամբողջ աշխարհը մոլորեցուց, երկիր ձգուեցաւ։ Անոր հրեշտակներն ալ միասին վար ձգուեցան։
10 Եւ երկինքի մէջ ուժեղ ձայն մը լսեցի, որ կ՚ըսէր. «Հիմա հասաւ մեր Աստուծոյն փրկութիւնը, զօրութիւնը եւ արքայութիւնը. հասաւ իր Օծեալին իշխանութիւնը. որովհետեւ ինկաւ մեր եղբայրներուն չարախօսը, ան՝ որ գիշեր–ցերեկ Աստուծոյ դիմաց չարախօսութիւն կ՚ընէր անոնց դէմ։
11 Մեր եղբայրները անոր վրայ յաղթանակ տարին Գառնուկին արիւնով եւ իրենց տուած վկայու–թեամբ, որովհետեւ անտեսեցին իրենց կեանքը եւ յանձն առին մահը։
12 Այս պատճառով՝ ուրախացէ՛ք, ո՜վ երկինք, եւ դուք բոլորդ՝ որ հոն կը բնակիք։ Վա՜յ ձեզի, երկի՛ր ու ծով, որովհետեւ Բանսարկուն ձեր մէջ ինկաւ. անիկա զայրոյթով լեցուած է՝ գիտնալով որ կարճ ժամանակ մը ունի։
13 Երբ վիշապը տեսաւ թէ ինք երկիր ձգուեցաւ, սկսաւ հետապնդել այն կինը որ արու զաւակ մը ծնաւ։
14 Կնոջ տրուեցան մեծ արծիւի մը երկու թեւերը, որպէսզի թռչի անապատին մէջ իր տեղը, ուր պիտի կերակրուէր որոշ ժամանակ մը, երեքուկէս տարի, օձին ներկայութենէն հեռու։
15 Ապա օձը իր բերանէն հեղեղի պէս ջուր թափեց կնոջ ետեւէն, որպէսզի հոսանքը առնէ տանի զայն։
16 Բայց երկինքը օգնեց կնոջ. երկիրը բացաւ իր բերանը եւ կլլեց այն ջուրը, որ վիշապը թափած էր իր բերանէն։
17 Վիշապը զայրացաւ կնոջ դէմեւգնացպատերազմելու անոր միւս զաւակներուն դէմ, որոնք Աստուծոյ պատուիրանին կը հնազանդէին եւ Յիսուսի համար իրենց վկայութիւնը կու տային։
18 Եւ վիշապը կանգնեցաւ ծովու աւազին վրայ։