1Ապա տեսայ որ ծովէն գազան մը կ՚ելլէր, որ եօթը գլուխ եւ տասը եղջիւր ունէր, իւրաքանչիւր եղջիւրին վրայ՝ թագ մը եւ իւրաքանչիւր գլխուն վրայ՝ հայհոյալից անուն մը։
2Գազանը որ տեսայ՝ յովազի կը նմանէր, ոտքերը՝ արջի ոտքերուն, բերանը՝ առիւծի բերանին։ Վիշապը անոր տուաւ իր զօրութիւնը, իր գահը եւ մեծ իշխանութիւնը։
3Գազանին գլուխներէն մէկը կարծես թէ մահացու կերպով վիրաւորուած էր, սակայն անոր մահացու վէրքը բուժուեցաւ։ Ամբողջ երկիրը զարմացաւ ու հետեւեցաւ գազանին
4եւ երկրպագեց վիշապին, որ իր իշխանութիւնը տուած էր գազանին, ու երկրպագեց նաեւ գազանին, ըսելով. «Ո՞վ կայ նման այս գազանին, ո՞վ կրնայ կռուիլ անոր դէմ»։
5Եւ անոր խօսելու լեզու տրուեցաւ՝ մեծ–մեծ խօսքեր եւ հայհոյութիւններ ընելու համար։ Անոր գործելու իշխանութիւն տրուեցաւ քառասուներկու ամսուան համար։
6Անիկա բերանը բացաւ՝ Աստուծոյ դէմ հայհոյութիւններ ընելով, եւ հայհոյեց անոր անունին, բնակարանին եւ երկինքի բնակիչներուն։
7Անոր արտօնուեցաւ պատերազմիլ Աստուծոյ ընտրեալներուն դէմ եւ պարտութեան մատնել զանոնք։ Նաեւ իշխանութիւն տրուեցաւ բոլոր ցեղերուն, ժողովուրդներուն, լեզուներուն եւ ազգերուն վրայ։
8Եւ անոր պիտի երկրպագեն երկրի բոլոր բնակիչները, անոնք՝ որոնց անունը աշխարհի ստեղծագործութենէն սկսեալ չէ գրուած մորթուած Գառնուկին պատկանող կեանքի գիրքին մէջ։
9Ով որ ականջ ունի՝ թող լսէ։
10Ով որ գերութեան տարուելիք է՝ գերութեան պիտի երթայ եւ ով որ սուրով սպաննուելիք է՝ սուրով պիտի սպաննուի։ Ահա հո՛ս է Աստուծոյ ընտրեալներուն համբերութիւնը եւ հաւատքը։
11Յետոյ տեսայ ուրիշ գազան մը, որ կ՚ելլէր երկրէն։ Անիկա գառնուկի եղջիւրներուն նման երկու եղջիւրներ ունէր եւ վիշապի նման կը խօսէր։
12Անիկա առաջին գազանին ամբողջ իշխանութիւնը ի գործ կը դնէր անոր դիմաց եւ կը ստիպէր որ երկիրը եւ անոր բոլոր բնակիչները երկրպագեն առաջին գազանին, որուն մահացու վէրքը բուժուեցաւ։
13Այս երկրորդ գազանը բազմաթիւ հրաշքներ գործեց եւ մինչեւ իսկ երկինքէն կրակ իջեցուց երկիր՝ մարդոց աչքերուն առջեւ։
14Անիկա իր կատարած հրաշքներով երկրի բոլոր բնակիչները մոլորեցուց առաջին գազանին դիմաց, անոնց ըսելով՝ որ կանգնեն արձանը գազանին, որ սուրով վիրաւորուեցաւ, բայց բուժուեցաւ։
15Եւ անոր իշխանութիւն տրուեցաւ գազանին արձանին շունչ տալու, որպէսզի արձանը խօսի, եւ ով որ չերկրպագէ գազանին արձանին՝ սպաննէ զայն։
16Գազանը կը ստիպէր որ բոլորն ալ՝ փոքր թէ մեծ, հարուստ թէ աղքատ, ազատ թէ ծառայ՝ իրենց աջ ձեռքին եւ ճակատին վրայ դրոշմ դնեն։
17Եւ ոչ ոք կարենայ գնել կամ ծախել՝ եթէ չունենայ այդ դրոշմը, այսինքն՝ գազանին անունը եւ կամ անոր անունին տառերուն թիւերուն համապատասխան գումարը։
18Հո՛ս է ահա իմաստութիւնը. ով որ խելացի է՝ թող գումարէ գազանին անունին թիւերը, որ մարդու մը անունին թիւերուն գումարն է։ Անոր անունին թիւը վեցհարիւր վաթսունվեց է։