Revelation 7— 2019

¹Ասկէ ետք չորս հրեշտակներ տեսայ, որոնք կեցածէին երկրի չորս անկիւններուն եւ բռնած էին երկրի չորս հովերը, որպէսզի անոնք չփչեն երկրի վրայ, ո՛չ ալ ծովուն վրայ եւ ոչ ալ ծառերուն վրայ։

²Տեսայ ուրիշ հրեշտակ մըն ալ, որարեւելքէն ելաւ եւ որ կենդանի Աստուծոյ կնիքը ունէր։ Անիկա բարձր ձայնով աղաղակեց չորս հրեշտակներուն, որոնց իշխանութիւն տրուած էր երկրին ու ծովուն վնասելու,

³եւ ըսաւ. «Վնաս մի՛ հասցնէք երկրին, ո՛չ ալ ծովուն եւ ո՛չ ալ ծառերուն, մինչեւ որ կնիքով դրոշմեմ իմ Աստուծոյս ծառաներուն ճակատները։

⁴Եւ լսեցի, որ Իսրայէլի տասներկու ցեղերէն կնքուածներուն թիւը հարիւր քառասուն չորս հազար էր.–

⁵Յուդայի ցեղէն տասներկու հազար, Ռուբէնի ցեղէն տասներկու հազար, Գադի ցեղէն տասներկու հազար,

⁶Ասերի ցեղէն տասներկու հազար, Նեփթաղիմի ցեղէն տասներկու հազար, Մանասէի ցեղէն տասներկու հազար,

⁷Շմաւոնի ցեղէն տասներկու հազար, Ղեւիի ցեղէն տասներկու հազար, Իսաքարի ցեղէն տասներկու հազար,

⁸Զաբուղոնի ցեղէն տասներկու հազար, Յովսէփի ցեղէն տասներկու հազար, եւ Բենիամինի ցեղէն տասներկու հազար։

⁹Ասկէ ետք տեսայ, եւ ահա՝ անհամար բազմութիւն մը, բոլոր ազգերէն, բոլոր ցեղերէն, բոլոր լեզուներէն եւ բոլոր ժողովուրդներէն, որոնք գահին եւ Գառնուկին դիմաց կանգնած էին՝ ճերմակ պարեգօտներ հագած, եւ իրենց ձեռքին՝ արմաւենիի ճիւղեր։

¹⁰Անոնք բարձրաձայն կ՚աղաղակէին, ըսելով. «Փրկութիւնը կու գայ մեր Աստուծմէ, որ կը բազմի գահին վրայ, կու գայ նաեւ Գառնուկէն»։

¹¹Բոլոր հրեշտակները որոնք գահին, երէցներուն եւ չորս կենդանիներուն շուրջ կանգնած էին, իրենց երեսին վրայ գետին ինկան գահին առջեւ եւ երկրպագեցին Աստուծոյ,

¹²ըսելով.– «Ամէն. օրհնութիւնը, փառքն ու իմաստութիւնը, գոհութիւնն ու պատիւը, կարողութիւնն ուզօրութիւնը մեր Տէր Աստուծոյ կը պատկանին, յաւիտեանս յաւիտենից. ամէն »։

¹³Երէցներէն մէկը ինծի ըսաւ. –Որո՞նք են այս ճերմակ պարեգօտ հագած մարդիկը եւ ուրկէ՞ կու գան։ –

¹⁴Տէր, դո՛ւն գիտես,– պատասխանեցի։ Անիկա ըսաւ ինծի. –Այս մարդիկը անոնք են, որոնք կու գան մեծ նեղութենէն։ Անոնք իրենց պարեգօտները լուացին եւ ճերմկցուցին Գառնուկին արիւնովը ։

¹⁵Ահաասոր համար է որ Աստուծոյ գահին դիմաց կանգնած են եւ գիշեր–ցերեկ զայն կը պաշտեն իր տաճարին մէջ. եւ գահին վրայ բազմողը հովանի պիտի ըլլայ անոնց։

¹⁶Անոնք ո՛չ պիտի անօթենան եւ ո՛չ ալ ծարաւնան. ո՛չ արեւը եւ ո՛չ ալ այրող տաքը վնաս պիտի տայ իրենց։

¹⁷Եւ Գառնուկը, որ գահին մէջտեղն է, հովիւի պէս պիտի արածէ զիրենք եւ առաջնորդէ կեանքի աղբիւրի կենսատու ջուրին, եւ Աստուած անոնց աչքերէն ամէն արցունք պիտի սրբէ։