Bible

1 Գահին վրայ նստողին աջ ձեռքին մէջ տեսայ գիրք մը՝ ներսէն ու դուրսէն գրուած եւ եօթը կնիքներով կնքուած։ 2 Եւ տեսայ զօրաւոր հրեշտակ մը, որ բարձրաձայն կը յայտարարէր. –Ո՞վ արժանի է քակելու գիրքին կնիքները եւ բանալու զայն։ 3 Բայց չկար մէկը, ո՛չ երկինքի մէջ, ո՛չ երկրի վրայ եւ ո՛չ ալ երկրի ներքեւ, որ կարենար բանալ գիրքը, ոչ ալ նայիլ անոր։ 4 Ես դառնապէս կու լայի, քանի չգտնուեցաւ մէկը, որ արժանի ըլլար բանալու գիրքը եւ նայելու անոր մէջ։ 5 Երէցներէն մէկը ըսաւ ինծի. –Մի՛ լար, ահաւասիկ Առիւծը՝ որ Յուդայի ցեղէն եւ Դաւիթի սերունդէն է՝ յաղթեց, եւ անիկա կրնայ քակել եօթը կնիքները եւ բանալ գիրքը։ 6 Ապա գահին մէջտեղ, չորս կենդանիներով եւ երէցներով շրջապատուած Գառնուկ մը տեսայ, որ կարծես մորթուած ըլլար։ Անիկա ունէր եօթը եղջիւրներ եւ եօթը աչքեր, որոնք Աստուծոյ եօթը հոգիներն են՝ աշխարհի բոլոր կողմերը ղրկուած։ 7 Գառնուկը գնաց եւ գահին վրայ նստողին աջ ձեռքէն գիրքը առաւ։ 8 Հազիւ առած, չորս կենդանիները եւ քսանչորս երէցները ինկան Գառնուկին առջեւ։ Անոնցմէ իւրաքանչիւրը ունէր քնար մը եւ ոսկի խնկաման մը՝ խունկով լեցուն, որոնք Աստուծոյ ընտրեալներուն աղօթքներն են։ 9 Անոնք հետեւեալ նոր երգը կ՚երգէին ու կ՚ըսէին.– «Արժանի ես առնելու գիրքը եւ քակելու կնիքները, որովհետեւ մորթուեցար եւ արիւնովդ Աստուծոյ համար գնեցիր նորժողովուրդ մը՝ բոլոր ցեղերէն ու լեզուներէն, բոլոր ազգերէն, ժողովուրդներէն։ 10 Զանոնք դարձուցիր քահանաներու թագաւորութիւն մը՝ ծառայելու մեր Աստուծոյ։ Անոնք պիտի թագաւորեն երկրի վրայ»։ 11 Տեսայ նաեւ եւ լսեցի ձայնը բազմաթիւ հրեշտակներու, որոնք կանգնած էին գահին, չորս կենդանիներուն եւ երէցներուն շուրջ։ Անոնք տասնեակ հազարներով եւ միլիոններով էին, 12 որոնք բարձր ձայնով կ՚երգէին.– «Մորթուած Գառնուկը արժանի է ստանալու՝ զօրութիւն, հարստութիւն եւ իմաստութիւն, կարողութիւն ու պատիւ, փառք եւ օրհնութիւն»։ 13 Եւ լսեցի որ երկինքի մէջ, երկրի վրայ, երկրի ներքեւ եւ ծովու մէջ գտնուող բոլոր արարածները կ՚ըսէին.– «Գահին վրայ նստողին, ինչպէս նաեւ Գառնուկին՝ օրհնութիւն, պատիւ, փառք ու զօրութիւն՝ յաւիտեանս յաւիտենից»։ 14 Չորս կենդանիները կը պատասխանէին. « Ամէն» ։ Եւ երէցները ինկան անոր առջեւ եւ երկրպագութիւն ըրին։